Un grupu d’alumnos de 5 años, énte un horru en miniatura / Alejandro Blanco
Nesti cole arxentín vas a clase como si tuvieres n’Asturies: el Cuadonga, un casu educativu escepcional. El Centru Asturianu de Santa Fe abrió en 1992 un colexu únicu na Asturies esterior: imparte cultura asturiana y agora tán en trámites por que los alumnos puedan llograr la doble titulación, sacase’l bachiller arxentín y l’español al empar. LNE /
El colexu cunta con 470 alumnos, de families coles más variaes raigaños, non solo asturiana, y ufierta una atención bien personalizada: «Conócense casi desque entren con pañales y 2 años d’edá hasta que tienen 18 y salen a la universidá».
Tolos alumnos reciben clase de cultura y tradiciones asturianes, celebren los Güevos Pintos, San Xuan, aprienden bailles rexonales y a xugar a los bolos. «Nun podemos perder lo nueso y nós tenemos acá’l pebidal», dicen los sos responsables.
¿Puede volase d’Arxentina a Asturies y tar de vuelta na mesma mañana? Puédese. Esto foi precisamente lo que fixeron la selmana pasada unos alumnos de 5 años d’un colexu de Santa Fe (Arxentina). Les sos profesores, vistíes d’azafates y pilotos, asemeyaron para ellos un aeropuertu, un avión y distintos paisaxes asturianos. Y allá fuéronse los neños cola so maleta d’avión, equipaxes etiquetaos y tarxetes d’embarque camín d’una Asturies recreada onde-yos esperaben escenes de nieve y de sablera, y un chigre ficticiu con bollos preñáivos, tortiella, sidra duce de verdá. Y un gaiteru tocando en vivu. Antes d’acabar la clase yá taben de vuelta.
Tou eso asocedió nun colexu d’Arxentina’l pasáu 18 de setiembre. Pero non nun colexu cualesquier. Trátase del colexu “La nuesa Señora de Cuadonga”, que pertenez al Centru Asturianu de Santa Fe y ye un casu únicu –y un fenómenu educativu sorprendente- nel universu de l’Asturies esterior. El colexu, que güei tien 470 alumnos, nació en 1992 por iniciativa del entós presidente del Centru, Carlos Rodríguez Sánchez, col respaldu d’empresarios asturianos aniciaos nesta rexón d’Arxentina, como foi’l casu del llanerense Francisco Rodríguez Martínez, yá fináu, fundador de la potente industria cafetero La Virgina, una referencia empresarial en Rosario.
Esti colexu onde s’imparte cultura asturiana, onde tolos alumnos celebren los Güevos Pintos o saben baillar a lo suelto, o aprendieron a xugar a los bolos, consolidóse como una referencia educativa dientro de Santa Fe. Tien más demanda de places de les que puede almitir y a él alleguen alumnos que non solo son descendientes d’asturianos. Nun país fechu gracies a la emigración, nel colexu Cuadonga asturianícense” alumnos *argeninos con padres, güelos y bisagüelos llegaos de toes partes del mundu.
Agora’l centru, que tien unos 90 profesores, ta dando un saltu calidable: ta a puntu de homologase por que los alumnos, amás de sacar la correspondiente titulación arxentina, tamién salgan d’ellí col títulu español de bachiller. Como dicen los sos profesores: “Esta ye una escuela bien completa y bien cargada de motivos”.
Lila Madalena, presidenta del Centru Asturianu de Santa Fe y docente xubilada del colexu, fía d’asturianos emigrantes, cunta cómo nació esta institución educativa: “El Centru Asturianu taba veníu a menos. Yera un bodegón, podríamos dicir. Un llugar onde la xente axuntábase, pero taba bien ablayáu. El predio que tenía, y que tien, yera magníficu, yera p’aprovechalo. Pero nun había recursos. Entós, persones con idees bien lluminoses pensó qué faer nesti llugar por que nun siguiera asina. Por que nun se perdieren les nueses costumes, la nuesa cultura. Tuvimos la suerte de cuntar con xente empresario de la ciudá de Rosario que nos echeren un gabitu bien importante. Y en conexón col señor Carlos Rodríguez, y dellos docentes capacitaos y especializaos, con dellos años d’esperiencia na docencia, pudo dise llevantando’l colexu. Pero bien a pulmón, bien despacin”.
Empezaron con una salita (un aula) de dos años, “onde empieza la escolaridá”. “Imaxínense que se diba a buscar a los alumnos puerta per puerta nel barriu, a ver quién quería venir. Diciéndo-yos a les families que tuvieren enfotu, que yera una escuela que diba tar abierta a la comunidá anque diba tener cultura asturiana. Lo difícil yera consiguir que nos tuvieren enfotu”.
