Esperamos otru día estable na rexón. Vamos ver nubes altes insignificantes polo que’l cielu como muncho va poder tar atapecíu. La probabilidá de precipitaciones va ser nula. Los vientos van ser fluexos polo xeneral tantu na mariña como nel interior. Lo más destacao del día, amás de la estabilidá, va ser l’ascensu de les temperatures. Les máximes nel cordal van caltenese, pero nel restu van xubir y van facer hasta 4 o 5 ºC más que les anotaes el llunes. Concretamente, va ser el sector central onde más s’esperimente dichu ascensu. Les mínimes van xubir en tol interior, incluyida’l cordal, y van caltenese ensin cambeos importantes (o en llixeru ascensu) na mariña.
El miércoles vamos amanecer con poques nubes escontra’l sur de la rexón pero con nubosidad na metá norte asturiana. Conforme meyora’l día vamos reparar como les nubes van dir estendiéndose por tol Principáu d’Asturies. Ello ye que nun se refuga que puedan escapase delles precipitaciones a lo llargo de la tarde.
Los vientos van tender a afitase de componente norte mientres la segunda parte del día. Tocantes a les temperatures, por cuenta de esi fluxu de norte más la presencia de nubes, van baxar les máximes ente 6 y 8 ºC na mayor parte de la Comunidá Autónoma. Les mínimes, sicasí, van xubir.
