RTPA / Reclamen la implicación de la comunidá educativa p’algamar la normalización de la discapacidá. Xixón acueye esti fin de selmana’l VIII Congresu internacional sobre acondroplasia. La Fundación Alpe ye la organizadora del eventu. Una edición que vuelve poner el focu nes dificultaes qu’atopen les persones con acondroplasia nel so día a día. El Comercio / LNE
La acondroplasia lleva apareyada una llucha diaria escontra la discriminación y los estereotipos. Problemes qu’interfieren, inclusive, nel derechu de toa persona al ociu, esplica Oier Anda.
Una problemática que, munches vegaes, naz nel periodu escolar. El ‘bullying’ cébase especialmente con estos mozos. Fai falta, apunta Javier Gutiérrez, una mayor reflexón por parte de la comunidá educativa.
- Normalización, tamién, p’aspirar a un puestu de trabayu, señala Marta Aguirre.
- L’accesibilidá ye otru de los grandes retos a superar p’Alejandro Hidalgo.
- Ye necesario cambiar la mirada pa dexar de ser la última discapacidá, dícennos, qu’inda xenera burlla.
La importancia del deporte convirtióse ayeri n’unu de los grandes protagonistes de la última xornada del VIII Congresu internacional en redol a l’acondroplasia qu’impulsó esta fin de selmana la Fundación Alpe sol lema «Abrazando futuru». «Foi un ésitu. Cumpliéronse les mires», valoró la presidenta d’Alpe, Susana Noval.
Esta edición, especial pol 25.º aniversariu de la entidá, llegó al so fin con una xornada apinada d’actividá. El protagonismu del deporte tuvo presente dende l’apertura de puertes, una y bones l’asociación «Cosa nuesa» entamó talleres de distintes modalidaes. Amás, pela tarde, llevose a cabu la charra «El deporte como ferramienta de vida». Coles mesmes, nes instalaciones del Real Grupu de Cultura Cuadonga, los participantes pudieron xugar a bádminton.
La despidida de les alredor de 900 persones de 35 países distintos que se dieron cita nesta edición llegó con una espicha nel llagar Castiello Bernueces. Sicasí, primeramente munchos asistieron a la entrega de les beques Biomarín y a la clausura con representantes institucionales. Tocantes a les meyores nos tratamientos de la enfermedá, hubo una ponencia alrodiu de Voxzogo, la primer melecina autorizada pal tratamientu de l’acondroplasia.
