Los asturianos llevamos pagando’l peaxe de l’autopista del Güerna (AP-66), la única vía rápida que conecta’l Principáu col restu de comunidáes al sur, dende 1983, añu de la inauguración de la so primer fase.
Década tres década, los conductores tuvieron qu’asumir un costu que se convirtió n’unu de los peaxes más caros d’España, un pesu constante non yá sobro quien usen esta vía pa trabayar, tresportar mercancíes o viaxar, tamién pa la economía asturiana polo xeneral, afectada por esti arancel tapáu que grava cualquier productu qu’entra o sale de la rexón y penaliza la nuesa competitividá.
El conseyeru de Movilidá, Alejandro Calvo, remarcó esti xueves que «los asturianos son soberanos» y que «les prioridaes d’Asturies», como pue ser la supresión del peaxe de l’AP-66 (El Güerna) «decidiránles los asturianos».
Calvo espresóse nestos términos dempués de que’l ministru de Tresportes, Óscar Puente, considerara güei que nun cree que la supresión del peaxe d’esta autopista que xune Asturies y Lleón seya un “problema central» nin p’Asturies nin pa los asturianos, anque sí almitió que «los políticos asturianos tienen derechu a defender lo que quieran».
En declaraciones a los medios, el conseyeru sorrayó que’l pidimientu de la supresión del peaxe surdió «por una cuestión de llegalidá, non por una cuestión d’axenda política», dempués de que la Comisión Europea dictaminara que la prórroga del peaxe d’esta autopista, al igual que la de l’AP-9 en Galicia, alcordada nel añu 2000 pol Gobiernu del PP, incumplió la normativa europea.
