https://www.instagram.com/theasturianer/
THE ASTURIANER N 64 / Títulu REDERAS
Autora LUCIA RIZZO / Testu: LETICIA SÁNCHEZ RUÍZ
Ente’l golor a salitre y el soníu de les foles, sobreviven les rederes asturianes: les últimes guardianes del mar que, con paciencia y maña, traviesen coles sos aguyes los kilómetros de filo qu’afilvanen la memoria d’un oficiu que s’escasta.
Heredaron la sabiduría d’Aracne, la que, según Plinio, enseñó al mundu l’arte del filo y de les redes, pero’l so llabor sostiense güei sobre una dura realidá. Cobren diecisiete euros per pieza, y nuna xornada d’ocho hores apenes llogren completar una y media. setecientos euros al mes por un trabayu que pide cuerpu, alma y vista.
Día tres día, texen ensin fuelgu les artes del mar.
El cercu, pa sardines y bocartes, volanta, pa la merluza, traces, pal tosquile.
y miños, finos y precisos, pa salmonetes, llinguaos o mariscos.
Cada rede puede algamar los seiscientos metros, y toes móntense a mano, filo a filo, nuedu a nuedu, como quien borda’l destín de los pescadores.
Les remortines físiques son el preciu de tanta entrega: tendinitis, dolores de llombu por trabayar de pies y en postures forzaes, manos sedaes y vistir cansada tres hores de precisión minuciosa. Aun así, siguen cosiendo, inclusive pel hibiernu, coles manos mancaes y el cuerpu escosu.
La burocracia afuega más que’l mar, la falta de relevu ye alarmante y el futuru del oficiu esfelpéyase (deshiláchase).
El calentamientu de l’agua alloña al rape y al pulpu; los arrastreros destrúin los fondos marinos y amenacien la pesca artesanal y la basura enrédase ente les sos redes y ente los sos díes.
Non puede vivise de coser redes, dicen.
Pero ensin elles, nun habría pesca, nin mar que cuntar.
Lucía Rizzo cual otra filandera más, foi texendo la so trayectoria como ilustradora autodidacta, dende la so Arxentina natal, especializándose nel dibuxu naturalista y emocional creando series d’ilustraciones personalizaes mientres prepara nuevos proyectos. @lu.rizzo.art Leticia Sánchez Ruiz, convídanos a cavilgar sobro’l poder de los filos de les trés Parques que representen el destín de los seres mortales y, dacuando, tamién el de los dioses.@letisaurus
