Vamos encarar una xornada marcada pola estabilidá casi na so totalidá, sacante delles agües que van entrar pel oeste a última hora de la tarde. Pela mañana prevense intervalos de nubes altes a lo sumo ensin posibilidá dalguna de precipitaciones. Mientres les primeres hores de la tarde tamién va siguir el tiempu estable anque vamos reparar la presencia tamién de nubes de tipu medio. Al anochecer, la nubosidad nel oeste asturianu va ser más compacta y va dexar precipitaciones que van dir percorriendo la rexón en dirección esti pero, conforme vaigan moviéndose, van dir perdiendo fuerza y van llegar yá bien foliaes al sector central del Principáu. Estes agües van tar acomuñaes a un frente fríu que va entrar viviegamente per Galicia pero se va dir debilitando hasta quedar como frente poco activu y ye polo qu’a la fin nun va acabar dexando precipitaciones en toa nuesa Comunidá Autónoma. Los vientos van soplar de sur-suroeste con intensidá moderada nel cordal y nel terciu occidental. Nel restu, van ser vientos fluexos polo xeneral. Les temperatures máximes van xubir llixeramente nel interior y apenes van esperimentar cambeos respecto al sábadu na mariña. Les mínimes, sía que non, van baxar bien llixeramente de forma local.
El llunes vamos empezar la selmana con tiempu estable, vientos moderaos de suroeste y temperatures a l’alza, sobremanera les mínimes.
