Empezamos una selmana na que va venir marcada por xornaes de fuertes vientos que van consiguir que les temperatures van ser prestoses. Enagora, namá prevense vientos con intensidá moderada de suroeste tantu nel cordal como nel sector occidental, ente que nel restu van ser fluexos. Nos cielos vamos reparar nubes de tipu mediu y alto con escasa probabilidá de precipitaciones pero que, sía que non, nun se refuga que pueda escapase dalgún bastiu nel sur del Principáu. Les temperatures máximes van ser bien similares a les del domingu, pudiendo namá baxar un pocu nel cordal. Les mínimes, sicasí, van xubir de forma xeneralizada y notable.
Nel suroeste hasta 8 ºC más, nel restu del interior hasta 5 ºC, y en mariña y proximidaes hasta 3 o 4 ºC más.
El martes sí que vamos empezar a notar un aumentu na intensidá de los vientos cuidao que yá van poder ser localmente fuertes nel cordal y zones del oeste asturianu, con posibilidá de que forma puntual puedan tamién dase n’otros puntos de la Comunidá Autónoma. Mientres tola segunda metá del día, va tar activáu l’avisu mariellu nel cordal por raches máximes de 90 km/h.
Pal miércoles les raches podríen llegar a superar los 110 o 120 km/h en zones altes de monte. Les temperatures claramente van tender a l’alza tantu’l martes como’l miércoles.
