RTPA /Los neños y neñes acceden a redes sociales y a la pornografía dende los 11 años, según un informe presentáu esti martes qu’alerta de los riesgos de los vezos tecnolóxicos a edaes tempranes, y que revela, amás, que la metá de los estudiantes lleva’l móvil al centru educativu, duerme con él y úsalu de madrugada.
Son datos de la investigación de mayor algame internacional sobre l’impactu del entornu dixital, qu’inxerta una consulta a más de 100.000 mozos y moces d’ente 10 y 20 años sobre los sos vezos cola tecnoloxía, fecha por Unicef, Red.es, la Universidá de Santiago de Compostela y el Conseyu Xeneral de Colexos Profesionales d’Inxeniería Informática.
L’informe, presentáu esti martes nun actu que zarró’l presidente del Gobiernu, Pedro Sánchez, afita que los menores tienen el so primer móvil a los 10,8 años y que’l 5,7% de los estudiantes podría desendolcar un patrón d’usu problemáticu de redes sociales, que na adolescencia asóciase con mayor malestar emocional, una peor calidá de vida y inclusive un mayor riesgu de suicidiu.
