- Alborecemos con nubes ya claros o abancios, tando más escampáu pal ocidente y más nuboso pal oriente con unes temperatures que tan alrodiu de los 10ºC, rexistrándose nel puirtu Payares 1,6ºC
- Güei vamos tener intervalos nubosos entemecios ente dellos claros o abancios con unes temperatures que van camudar poco, sicasí les mínimes que van dase esti alborecer sedrán más baxes que les de les últimes xornaes. L’aire sedrá sele ya variable.
- Mañana miércoles la llegada d’una masa fría con vientu del norte va dir enfriando l’ambiente y amás vendrá acompangada de precipitaciones durante la tarde, tando más seliquino pela mañana cuando inclusu veremos dalgo’l sol. La nieve surdierá anicialmente perriba de los 1500m pa dir baxando la cota hasta los 1100m al finar el día.
- El xueves sedrá un día pasáu per agua con xarabatos frecuentes, sobre too pela tarde cuando puen ser persistentes y de calter fuerte, amás les temperatures siguen en descensu y les nevaes pela cordelera sedrán copioses, surdiendo la nieve perriba de los 1000m pela mañana pa baxar al finar el día a los 700-800m. Nel llitoral los xarabatos vendrán acompangaos de truena y xarazu.
- Nel riscar del vienres va seguir lloviendo y nevando con fuercia pero a partir del mediudía dirá meyorando’l tiempu, abriranse dellos claros y remitirán les precipitaciones d’oeste a este con unes temperatures que van camudar poco o subirán llixeramente les másimes.
El fríu n’altor solo nos va rozar anque tovía puen camudar los mapes, 100km qu’entre la masa fría n’altor más al oeste y la situación sedría muncho más potente, pero esto yá lu veremos.
