Actualidá / L’I Congresu Internacional de Turismu Rural d’Asturies empieza mañana con toles places cubiertes. Les inscripciones cerraron la pasada selmana al completase l’aforu para les sesiones nel Parador de Cangues d’ Onís. Una trentena d’axencies especializaes d’Alemaña, Italia, Países Baxos, Reinu Uníu y España percuerren el Principáu y van caltener mañana un alcuentru comercial con empresariáu.
L’alcuentru, entamáu pol Gobiernu del Principáu con motivu del 40º aniversariu de la marca Asturies Paraísu Natural, va axuntar mientres dos xornaes a profesionales, representantes institucionales y espertos nacionales ya internacionales para aldericar sobro’l futuru del sector y asitiar Asturies como referencia internacional del turismu rural sostenible.
Como antoxana del congresu, una trentena d’axencies de viaxe especializaes d’Alemaña, Italia, Países Baxos, Reinu Uníu y España participen dende’l domingu en trés itinerarios de familiarización per Asturies. Estos percorríos, centraos na naturaleza y l’autenticidá de los destinos rurales, traviesen dalgunos de los paisaxes más pervalibles de la comunidá, como cinco de los siete acutes de la biosfera y la mariña meyor caltenida d’España. Los axentes esfrutaron, amás, d’esperiencies de turismu activu, cultural y gastronómicu representatives de l’autenticidá del destín.
Loscoperadores internacionales y nacionales van caltener mañana, antes de l’apertura del congresu, un alcuentru de trabayu con empreses turístiques asturianes, 10:00 a 14:00 hores, nel Parador de Cangues d’Onís, onde van intercambiar propuestes de comercialización y collaboración profesional.
La inauguración oficial va tener llugar a les 15:30 hores y va correr al cargu de la vicepresidenta del Principáu, Gimena Llamedo, nun actu que va cuntar cola participación de representantes institucionales y empresariales del sector.
El primer bloque del congresu, tituláu El nuevu viaxeru y l’evolución del turismu rural, va encetar los cambeos nel comportamientu del visitante, les nueves motivaciones del turismu rural y los retos de modernización, ente que la xornada del xueves va centrase específicamente en sostenibilidá y turismu responsable.
Ente los ponentes figuren espertos n’analises d’enclinos, responsables de plataformes dixitales y d’asociaciones rurales de distintes rexones españoles, que van tratar sobro innovación, autenticidá y relevu xeneracional.
Esti alcuentru aspira a consolidar Asturies como referente européu en turismu rural sostenible, reforzando la so posición nes exes estratéxiques de la política turística del Gobiernu del Principáu: internacionalización, desestacionalización y triple sostenibilidá (ambiental, económica y social).
