Imaxe: Evelio Acevedo, director gerente del M. Thyssen-Bornemisza; María Vallinas, artista asturiana; Vanessa Gutiérrez, conseyera de Cultura, Política Llingüística y Deporte; Mónica Cofiño, artista asturiana; Semíramis González, directora de LABoral Centru d’Arte y Creación Industrial; Guillermo Solana, director artístico del M. Nacional Thyssen-Bornemisza.
La conseyera de Cultura, Política Llingüística y Deporte y presidenta de la Fundación Llaboral Centru d’Arte y Creación Industrial, Vanessa Gutiérrez, firmó esti mediudía un alcuerdu de collaboración col Muséu Nacional Thyssen-Bornemisza que va dexar que dos artistes residentes n’Asturies puedan presentar cada añu les sos creaciones nel muséu madrilanu, dientro del ciclu de performances Visión y presencia, que cada añu se celebra cola presencia de creadores del ámbitu nacional y internacional.
Esti alcuerdu va dexar tamién al Thyssen-Bornemisza proponer cada añu a trés artistes nacionales o del contestu internacional pa que presenten les sos pieces performatives nel centru d’arte Llaboral, en Xixón. El conveniu va tener vixencia hasta’l 2028, pudiendo prorrogase.
La collaboración ente les dos instituciones culturales va empezar yá nel 2026. Asina, les artistes asturianes María Vallina (Llangréu, 1978) y Mónica Cofiño (Xixón, 1980), van escenificar les sos pieces performatives na quinta edición d’esta iniciativa Visión y presencia en dellos espacios del Muséu Nacional Thyssen-Bornemisza. En concreto, Vallina va presentar el 21 de xineru del 2026 la so obra Silencio roto para un encuentro en los límites habitables, y Cofiño va escenificar el 18 de payares del añu próximu la so pieza Radiofonías de una guerra.
De la mesma manera, gracies a esti alcuerdu d’intercambéu, trés artistes del ámbitu nacional o internacional que formaron parte de les ediciones previes del ciclu van llevar a cabu delles acciones performatives a lo llargo del 2026 nel equipamientu cultural asturianu. Van ser l’asturiana Noemi Iglesias Barrios, la camerunesa-española Agnes Essonti y la canaria Teresa Correa.
El conveniu firmóse y presentóse güei nuna rueda de prensa encabezada pola conseyera Vanessa Gutiérrez, el director artísticu del Thyssen, Guillermo Solana, y el director xerente, Evelio Acevedo. Toos ellos coincidieron na importancia d’esti alcuerdu de collaboración pa les artistes asturianes y estimaron la iniciativa.
Sobre’l ciclu Visión y presencia
El ciclu de performances d’artistes muyeres Visión y presencia, del que ye creadora Semíramis González, directora actual de Llaboral, llega a la so quinta edición cola presentación nel 2026 de diez acciones nueves que creadores nacionales y internacionales idearon pa escenificales en dellos espacios del Thyssen. Esta serie, que dexa facer visibles problemes d’interés social, propón temátiques vinculaes a les tradiciones, l’ecofeminismu, la emerxencia climática o les migraciones.
Nel 2026, el ciclu va cuntar con artistes procedentes d’España, Guatemala, Chile, Guinea Ecuatorial, y Perú. El ciclu articula collaboraciones institucionales con otros centros como’l CAAM (Centru Atlánticu d’Arte Modernu de Gran Canaria), l’Axencia Española de Cooperación Internacional pal Desenvolvimientu (AECID), amás de festivales como Ellas Crean o la Bienal de Mujeres en las Artes Visuales.
Cola incorporación de Llaboral Centru d’Arte a esta collaboración afítase la llinia de la dirección nueva, basada nes redes con otros centros nacionales pa trabayar en xunto y poner en valor la creación asturiana. Amás, col arranque del ciclu en Llaboral amplíase’l marcu pa qu’artistes nacionales y internacionales trabayen nel centru asturianu.
