Vanesa Fernández, la nueva directora xeneral d’Igualdá d’Asturies, analiza los principales retos qu’enfrenta la rexón y les meyores llograes hasta la fecha para algamar una equidá real. «Vivimos n’una sociedá patriarcal na que cuesta enforma qu’esos cambeos producwnse de manera rápida; avancen bien adulces». ✒️ Esther Rodríguez/📸 Héctor Herrería / La Voz
«Qu’haya víctimes de violencia de xéneru reflexa
que les muyeres siguen pagando cola so vida les desigualdaes»
La psicóloga Vanesa Fernández García (Nava, 1981) ocupa dende va mes y mediu la dirección xeneral d’Igualdá del Principáu d’Asturies, n’asumiendo María Jesús Álvarez el cargu como senadora. Quien foi secretaria d’Igualdá y yera anguaño de Bienestar Emocional na Federación Socialista Asturiana, cuenta con una amplia esperiencia na atención a muyeres víctimes de violencia de xéneru y na promoción de la igualdá, sofitada por una sólida formación especializada en malos tratos y salú mental.
Con motivu del 25N, Día Internacional pa la Eliminación de la Violencia contra la Muyer, cavilga sobro los finxos consiguíos y los derechos qu’inda queden por conquistar p’avanzar escontra una sociedá verdaderamente equitativa en tolos ámbitos, dende la educación y el trabayu hasta la participación política y la vida cotidiana.
—¿Qué significa pa usté ser la directora d’Igualdá d’Asturies? ¿Qué significa na so carrera profesional dar esti pasu?
—Enfrento’l cargu con responsabilidá, porque, quieras o non, tou rellacionáu coles polítiques d’igualdá implica, n’última instancia, salvar vides. Cuando desenvuelves polítiques d’igualdá, tas potenciando l’atención a les víctimes, los recursos y tolo demás. Por eso ye xuna enorme responsabilidá.
—¿Cuálos diría que son los principales desafíos d’implementar polítiques d’igualdá?
—Qu’eses polítiques d’igualdá se caltengan nel tiempu y que llogremos con elles cambeos estructurales. Vivimos nuna sociedá patriarcal na que cuesta enforma qu’esos cambeos se produzcan de manera rápida; avancen bien adulces. Por eso, el mayor retu ye consiguir tresformamientos estructurales que xeneren un verdaderu cambéu, esi «clic» na sociedá, y que nos dexen convertila nuna sociedá feminista.
—¿Cómo valora’l movimientu feminista n’Asturies?
—El movimientu feminista n’Asturies ye bien fuerte; tienen una gran conocencia, tán bien cohesionaes y, al mio pensar, realicen un trabayu escelente na rexón.
«Queremos modificar la Llei d’Igualdá del Principáu por qu’amás vuelva asitiar a Asturies como referente en lleis y polítiques d’igualdá»
—Este ye’l so primera 25N como Directora Xeneral d’Igualdá. Teniendo en cuenta que’l primer asesinatu machista del añu tuvo llugar equí ,n’Asturies, ¿Cómo encara esti día tan especial?
—Anguaño n’Asturies ta siendo bien duru, yá que llevamos trés víctimes de violencia de xéneru. Que, a la fin, haya víctimes reflexa que les muyeres siguen pagando cola so vida les desigualdaes estructurales. Por eso, ye un gran retu poder llegar a toles víctimes, ufierta-yos los recursos necesarios y llograr el nuesu oxetivu: que nun haya más víctimes.
—¿Qué midíes concretes tien entamaes para erradicar la violencia de xéneru n’Asturies?
—Pos se trataría de siguir con tolo que se vieno desenvolviendo nel Principáu d’Asturies. Llevamos años implementando polítiques d’igualdá y potenciando recursos, polo que tenemos de siguir nesa llínea. Tenemos que siguir ameyorando tou lo rellacionao cola detección y la prevención, según cola educación, reforzando programes como COEducastur, que considero bien bonu y potente, yá que lleva la igualdá a les aules en tolos niveles educativos.
Tamién tenemos de siguir fortaleciendo la formación de tolos profesionales que tienen contactu con víctimes de violencia de xéneru, asegurando que tengan xuna preparación especializada y una conocencia fonda de los procesos, les situaciones y les necesidaes de les víctimes, pa poder ufiertar la meyor respuesta posible.
Amás, ye necesariu siguir potenciando los recursos y ampliando la rede de cases d’acoyida. Otru retu importante ye’l cambéu de la Llei d’Igualdá d’Asturies, que yá tien munchos años. El nuesu oxetivu ye que la nueva llei, frutu de los estudios y cambeos que tamos realizando, vuelva asitiar al Principáu d’Asturies como referente en lleis y polítiques d’igualdá. Ente los aspeutos que tamos evaluando atópase la inclusión de toles formes de violencia na llei.
«Ye esencial ufiertar información veraz sobro los recursos disponibles y nun utilizar cuestiones puntuales con fines partidistes, una y bones eso xenera rocea ente les víctimes, lo cual ye perxudicial»
—¿Cómo van siguir sofitando a les víctimes de violencia de xéneru? ¿Qué midíes entamáis tomar pa garantizar la so seguridá y bienestar, especialmente considerando los problemes recién que surdieron coles pulseres electróniques?
—Lo que sí tenemos claro ye que tenemos de siguir potenciando toles midíes y recursos. Nesti sentíu, dende’l Gobiernu del Principáu d’Asturies tamos fortaleciendo los centros asesores de la muyer, ampliando la plantiya de psicólogues en dichos centros. Tamién tamos reforzando la rede de cases del Principáu; anguaño incorporemos dos pisos más, unu n’Uviéu y otru en Xixón. Amás, aumentemos significativamente les ayudes a les víctimes de violencia de xéneru, incluyendo l’ampliación de la edá hasta los 26 años por que los güérfanos y güérfanes puedan recibir sofitu.
Considero fundamental siguir reforzando estos recursos. Al respective de les pulseres electróniques, creo que ye esencial ufiertar información veraz sobro los recursos disponibles y nun utilizar cuestiones puntuales con fines partidistes, una y bones eso xenera rocea ente les víctimes, lo cual ye perxudicial. Lo que tenemos de garantizar a les víctimes ye la respuesta que precisen, y que tamién sepan qu’esa respuesta ye la correcta.
—¿Cómo valora’l trabayu que se realiza dende’l Centru de Crisis?
—Bien positivamente. Realicen xuna llabor fantásticu; tanto les abogaes como les psicólogues son profesionales bien comprometíes, con gran formación y amplia esperiencia, y considero que desempeñen un trabayu absolutamente necesariu.
«Queremos que’l feminismu tea presente en tolos ámbitos: nes instituciones, nos recursos y en toles polítiques»
—¿Qué estratexes tien previstu poner en marcha pa promover la igualdá n’Asturies?
—A la fin, les polítiques d’igualdá son un conxuntu integral. Creo que la estratexa principal que podemos poner en marcha ye llograr que’l feminismu tea presente en tolos ámbitos: nes instituciones, nos recursos y en toles polítiques. Les polítiques d’igualdá nun se llinden a lo que se fai dende la Dirección Xeneral; tienen de ser tresversales y reflexase en tolo que desenvuelve’l Gobiernu del Principáu. Por eso, considero que la llínea a siguir ye que la igualdá tea presente en tolo que faemos.
—¿Cómo entama trabayar con otres instituciones y entidaes pa garantizar que la igualdá tea presente en tolo que se fai?
—Con tola coordinación interinstitucional que realizamos de cutio, y como mentaba antes, la formación ye fundamental en toles instituciones. Tolos profesionales tienen de conocer qué ye la violencia de xéneru y qué recursos tán disponibles.
Tamién ye importante saber cómo actuar: cómo atender a una víctima, cómo detectala y cómo identificar los nicios de que xuna muyer puede tar sufriendo violencia de xéneru. Por eso ye crucial coordinase con otres instituciones y garantizar que reciban formación fayadiza: colos estamentos xudiciales, col Serviciu de Salú, especialmente n’atención primaria, onde los profesionales tienen de poder detectar estos nicios. Lo mesmo asocede en Derechos Sociales. Cuando xuna muyer s’avera a los servicios sociales pa solicitar ayuda, ye necesariu que na entrevista pueda valorase la situación con sensibilidá y detéctense posibles casos de violencia de xéneru.
«La sociedá tien d’arreyase nesta llucha y faer ver a les víctimes de violencia que nun tán soles, que cunten con sofitu»
—Pa llograr la igualdá, non solo tienen de tar implicaes les instituciones y les entidaes públiques o privaes, sinón tamién la sociedá nel so conxuntu. ¿Cómo entama concenciar a la ciudadanía, especialmente a la xente nuevo, sobro la importancia de construyir una sociedá igualitaria y de lluchar contra la violencia de xéneru?
—Dende les instituciones podemos poner en marcha munches lleis, recursos y midíes, pero si nun cuntamos cola implicación de la sociedá, nun vamos llograr tolo que precisamos. La sociedá tien d’arreyase y faer ver a les víctimes de violencia que nun tán soles, que cunten con sofitu. Creo que la meyor forma de concenciar a la sociedá ye al traviés del feminismu y l’educación n’igualdá: educar dende pequeños en relaciones respetuoses ya igualitaries.
—¿Qué mensaxe-y gustaría treslladar a les muyeres asturianes esti 25N, nesti día tan importante?
—Nun sé si’l mensaxe que quiero tresmitir va namá dirixíu a les muyeres, porque munches vegaes enfocamos principalmente nelles. Creo que ye fundamental que les muyeres cunten colos recursos necesarios y sepan que tamos ende pa sofitales. Pero tamién me gustaría unviar un mensaxe a los agresores: ellos siempres nos van a tener enfrente. Como sociedá, el mensaxe ye doble: per un sitiu, que les víctimes nun tán soles y van recibir tol sofitu que precisen; y por otru, que los agresores van enfrentase a nós y vamos utilizar toles ferramientes disponibles p’actuar contra ellos.
