Esperamos otru día con unes condiciones meteorolóxiques estables en prácticamente tol Principáu. Vamos amanecer con poca nubosidá y, a lo llargo de la xornada, vamos reparar intervalos de nubes altes a lo sumo. La única esceición va tener llugar nel terciu oeste asturianu onde va apaecer nubosidá de tipu baxu, sobremanera na mariña occidental, por cuenta de la cercanía d’un frente estacionariu que nun va llegar a entrar pero, igualmente, nun se refuga que pueda escapase dalguna gota nesi sector mientres la tarde. Los vientos van ser fluexos pudiendo predominar por momentos de suroeste. Les temperatures máximes van xubir llixeramente ente 1 y 2 ºC en tola rexón respecto al xueves. Les mínimes apenes van variar.
El sábadu sí que s’esperen cambeos importantes. La mañana va presentase estable, pero a partir del mediudía van entrar nubes y van dexar precipitaciones pola mor del pasu d’un frente fríu que va cruciar la rexón.
La tarde va ser bien lluviosa y la cota de nieve va acabar asitiándose sobro los 1100 o 1200 metros d’altor. Los vientos van empezar soplando de suroeste con raches moderaes y rolarán a noroeste cola llegada del frente fríu.
El domingu va ser un día cargáu de nubes con precipitaciones que van dir de más a menos col intre de #tardar. La cota de nieve va rondar los 1100 metros tou el día. Les temperatures van baxar.
