La Unión de Consumidores encamienta compres «segures y conscientes» nel ‘Black Friday’. TPA Güei ye ‘Black Friday’, el día de descuentos col que cada añu entamen les compres navidiegues. El 25% de les ventes de comerciu electrónicu de tol añu rexístrense estos díes. El gastu mediu por persona supera los 230 euros, ye’l doble de lo que gastamos por casu l’añu pasáu n’Asturies, en llotería de Navidá.
El 77% de los consumidores tien bien en cuenta esta selmana nel so calendariu y tres de cada cuatro persones merquen en grandes plataformes
Estos díes multipliquen les compres online, y tamién los paquetes que lleguen a los almacenes. Según la patronal de les Empreses de Loxística y Tresporte, nesta campaña van xestionar 125 millones d’unvios, un 8,7% más que l’añu pasáu. Sicasí, el mayor volume de trabayu espérase nos próximos díes.
El mayor volume de trabayu obliga a reforzar plantiyes. Nel almacén d’Amazon incorporáronse 300 persones como refuerzu pal ‘Black Friday’ y la campaña de Navidá. Nos díes de mayor demanda d’esta campaña, l’equipu llegó a procesar más de 500.000 productos.
Los descuentos del ‘Black Friday’ entá podrán atopase en munchos negocios el fin de selmana.
La Unión de Consumidores encamienta compres «segures y conscientes» nel ‘Black Friday’
La Unión de Consumidores d’Asturies (UCE) espublizó una guía de conseyos pa que los veceros puean realizar compres “segures, conscientes y responsables» nel ‘Black Friday’ y el ‘Ciber Monday’.
La entidá encamentó qu’en compres online s’empleguen contraseñes segures, nun se faigan tresferencies directes a desconocíos, compruébese la dirección fiscal de la empresa y evítese dir a ufiertes dende anuncios en redes sociales.
La Unión de Consumidores d’Asturies tamién aconseyó que s’eviten les compres compulsives, verifíquese que’l descuentu ye real y calténgase siempres la garantía de los dispositivos electrónicos.
