La rede de promoción turística Pueblos Máxicos d’España incorpora 22 nuevos destinos, ente los que s’atopen dos del Occidente d’Asturies. MAPA/ El Comercio
Cuaña y Navia van pasar a formar parte, en 2026, de la Rede de Pueblos Máxicos d’España, una organización ensin ánimu d’arriquecimientu que promueve el desenvolvimientu turístico y territorial de les poblaciones que pertenecen a ella.
L’oxetivu fundamental ye la reconocencia a los recursos locales, impulsando’l desenvolvimientu del so turismu local so la insinia «Pueblos Máxicos d’España», que fai de diferenciador ente los más de 8100 conceyos qu’esisten nel Estáu español.
Asturies puede presumir (y presume) de tener un bon númberu de pueblos con encantu. D’ende que nun resulte estrañu ver crecer la representación rexonal na Rede de Pueblos Máxicos d’España, una entidá de promoción turística qu’arrexunta a territorios qu’afiten el so futuru y el de les sos xentes na riqueza de la so hestoria, les sos tradiciones y el so patrimoniu natural. De cara al añu 2026, la organización incorporó 22 nuevos destinos de too el país, ente ellos, dos del Occidente asturianu: Navia y Cuaña.
«Ríu, mar y monte s’abracen en Navia, villa costera que caltien l’alma marinera», diz la rede sobro la capital naviega. Y añede: «El so puertu, el paséu marítimu y l’arquitectura indiana amuesen xuna Asturies abierta al océanu, arguyosa de la so hestoria y hospitalaria con quien llega».
Sobro la vecina Cuaña, que s’atopa na ribera opuesta de la ría que xune y dixebra dambos conceyos, la organización señala: «Ente mar y monte, Cuaña guarda unu de los castros más importantes del norte peninsular. El so patrimoniu arqueolóxicu, al pie de la guapura de la so mariña y les sos aldegues, conviértela en destín que xune hestoria, paisaxe y hospitalidá».
Cola incorporación de Navia y Cuaña, la Rede de Pueblos Máxicos d’España suma once destinos del Principáu. Los otros nueve son el conceyu d’Ayande y les villes de Cangues d’Onís, Castropol, Cecos (Ibias), L.luarca, Salas, San Esteban (Muros de Nalón), Tapia de Casariego y Taramundi.
La Rede de Pueblos Máxicos d’España ye una iniciativa qu’identifica y promociona conceyos que destaquen pol so patrimoniu, hestoria, guapura y tradiciones, buscando impulsar el turismu sostenible y el desenvolvimientu local. La rede arrexunta a más de 150 pueblos, que son promovios al traviés de diverses estratexes, incluyendo l’aplicación móvil y la web oficial del proyectu.
