Esperamos una día marcáu polos fuertes vientos mientres la mañana. L’Axencia Estatal de Meteoroloxía va tener activáu l’avisu naranxa nel cordal por raches d’hasta 110 km/h. Esti avisu va concluyir a les 14 hores. Igualmente, la mariña oriental va tar baxu avisu mariellu por raches que podríen rexistrar hasta 90 km/h y va desactivase a les 14 hores. En cuanto al aguaxe, hasta les 10 hores vamos tener avisu mariellu na mar por foles d’hasta 5 metros d’altor. Mientres la tarde los vientos van dir a menos y van acabar siendo fluexos polo xeneral. Respectu al estáu de los cielos, prevense intervalos de nubes altes pela mañana con enclín a apaecer nubes medies ya inclusive baxes mientres la tarde pel oeste del Principáu. Les precipitaciones van ser poco probables y, sía que non, podríen escapase en zones del terciu oeste y nel sur d’Asturies.
Les temperatures máximes van caltenese ensin grandes cambeos polo que vamos tener un ambiente térmico bien prestosu. Les mínimes namá van poder baxar nel oeste de la Comunidá Autónoma. Mañana miércoles espérase más nubosidá escontra l’oriente onde les precipitaciones van ser más frecuentes. Mientres el día la nubosidá va estendese escontra’l restu. Les temperatures van baxar de forma xeneralizada tantu nel casu de les máximes como nel de les mínimes.
