Les sensaciones y emociones del arte con identidá asturiana en tiempos de la IA. Cinco artistes asturianes o residentes n’Asturies comparten la so esperiencia sobro la importancia del apueste por realizar les sos creaciones nel territoriu local y la so visión sobro’l futuru del oficiu. El Diario /
Una hestoria en redes sociales compartiendo una ilustración atélite, un mercadín con llámines pintaes a mano, un puestu nes fiestes del Descensu de Llaviana’ al llau de la música más tradicional de la zona, un gran eventu en Xixón como’l ‘Lab Shop’ para amosar qué ufierten los talentos d’arte local y llámines qu’acompañaes d’una preciosa imaxe amuesen palabres asturianes qu’usaben les nueses güeles o que nos recuerden que “Asturies nun entiéndese ensin la mina”.
Son les creaciones de cinco artistes asturianes o que moren nel Principáu que, cola so profesionalidá orixinalidá, tresmiten sensaciones y emociones nos tiempos de la Intelixencia Artificial (IA). Nieves González (‘Nieve Sita’, nos sos perfiles de redes sociales), María Ortiz Iglesias, Ana Cachafeiro, Agustina Palacios Machado y Celia Pandiella compartieron la so esperiencia con Eldiario.es Asturies.
Nieves González, conocida como ‘Nieve *Sita’ nel so perfil de redes sociales, ye una muyer que ganó muncha visibilidá nos últimos años col so apueste pola llingua asturiana y por honrar a les tradiciones de la tierrina. Y tar faciendo con ésitu.
Nieves González, ‘Nieve Sita’ nel so perfil de redes sociales. Cunta que quiciabes esta bona acoyida que tienen les sos creaciones débense a qu’ella percibe les necesidaes de la sociedá de buscar un pocu los raigaños y “lo particular”. Y arguméntalo: “si dexamos llevar por esta globalización a la fin acabamos perdiendo la identidá, d’ende creo que vien un pocu l’ésitu de lo local y lo único”.
Compaxinar actividaes. Ella nun vive solo del arte. Dedícase a la educación y compaxinar dambes actividaes dalu una estabilidá. Les redes sociales fueron un gran escaparate del so trabayu y munches persones encárguen-y les so creaciones pero reconoz que “vivir del arte n’Asturies (o en cualesquier parte) ye posible pero bien complicáu ya inestable, depende tamién enforma de modes, de contactos”.
Nieve González ye una artista comprometida y, na imaxe qu’acompaña a esti reportaxe, puede vese el so llau más solidariu, al realizar un cartelu en sofitu a ‘Los Seis de La Suiza’.
María Ortiz María Ortiz Iglesias ye ilustradora y cree que la parte positiva del so oficiu ye que-y dexa vivir n’Asturies, ser artista y cuntar con veceros de cualesquier parte del mundu. Asegura qu’en “la figura d’ilustradora” ye onde puede dar rienda suelta a la so creación y compaxinala cola so otra actividá llaboral na Escuela d’Arte d’Uviéu.
Forma parte d’APIAS, l’asociación de profesionales d’ilustraciones n’Asturies, que foi creada en 2024, y onde los sos integrantes dedícase a dar más visibilidá a artistes en diversos espacios. Ortiz siente qu’estes iniciatives van dando más visibilidá al arte local. Gracies a el so trabayu como profesora d’otros artistes reconoz qu’atopa enforma talentu nuevo.
Una de les obres de l’artista Ana Cachafeiro.
Ana Cachafeiro empezó la so formación n’arte en 1998 y nun paró dende entós. La so primer exhibición fora d’Uviéu foi nel so propiu pueblu na cuenca minera, na Sierra del Trabanquín, un eventu qu’entamaba Manolo, de ‘Nuberu’.
Ella resalta la enorme importancia del arte para la tradición y cultura d’Asturies: “Siempres esistió la figura del artesanu. Forma parte de la nuesa cultura como pueblu y de los nuesos raigaños. Dende la orfebrería celta hasta la ebanistería presente na arquitectura tradicional, como los horros, o los texíos de los traxes de baille, el trabayu artesanal tuvo siempres amestáu a la nuesa identidá”.
L’apueste pola creación local. Ana Cachafeiro considera que “apostar pol arte y la creación local ye,a última hora, una manera de caltener la nuesa hestoria, la nuesa cultura y la nuesa manera de ser”.
Al so xuiciu, Asturies siempres tuvo ciertu mieu a la so propia riqueza: a la so llingua, a la so identidá y a la so capacidá creativa, anque cree qu’esta idea adulces ta camudando. Y destaca qu’anguaño “esisten numberosos colectivos, cases sociales y sales onde esponer y hai talentu de sobra”.
Una creación d’Agustina Palacios.
Agustina Palacios Machado ye d’Arxentina. Lleva n’Asturies dende empiezos de 2024 y yá consiguió faese un buecu na rexón, coles sos creaciones, gracies a les sos collaboraciones con propuestes culturales de distintes asociaciones. Valora la importancia de tener una identidá sólida y un productu curiosu y insertable nel mercáu.
Consumir artesanía local. Agustina Palacios ye optimista sobro’l panorama actual del arte, porque reparó que “la xente ta acostumada a consumir artesanía local, lo qu’abre les puertes a los artistes de distintes disciplines a vender y a que diversos espacios, centros, chigres ya instituciones entamen mercaos. Asina se pluraliza la ufierta faciendo que l’arte sía daqué accesible”.
La so esperiencia demuéstralu qu’hai munchos llugares que son receptivos a recibir propuestes y collaborar viviegamente colos artistes.
Celia Pandiella xuntu a una de les sos obres.
Celia Pandiella reconoz que’l trabayu de los artistes cada vez tien xuna meyor acoyida y cree que ye debíu en gran parte gracies al trabayu d’asociaciones, espacios y proyectos qu’apuesten viviegamente polos artistes locales, entamando esposiciones y alcuentros qu’averen l’arte a la xente d’una forma más accesible y cercana.
Desque decidió dedicase a la so pasión pudo constatar la importancia de disponer d’estos espacios más atentos, onde pueden esplicase los procesos y normalizar la idea de que l’arte puede formar parte de la vida cotidiana, non solo de grandes galeríes.
