- Alborecemos col cielu cubiertu y dalguna gotera con unes temperatures que tan alrodiu de los 8ºC, rexistrándose nel puirtu Payares 2,6ºC.
- Güei vamos tener el cielu mui nuboso con precipitaciones febles en xeneral que sedrán más frecuentes y abondoses pela tarde con unes temperatures en descensu ya col aire que sedrá del nordés sele en xeneral. La cota de nieve va tar perriba de los 1800m pela mañana pa baxar pela tardiquina hasta los 1000m al finar el día.
- Mañana domingu descenderán bultablemente les temperatures y nel cielu tendremos intervalos nubosos cola posibilidá de dalgún xarabatu o precipitación feble, sobre too na metá oriental d’Asturies onde puen tener calter moderáu. La cota de nieve va tar ente los 300-400m y l’aire sedrá del nordés xele en xeneral.
- El llunes la entrada d’aire fríu n’altor va reactivar les precipitaciones pela tarde ya tendremos xarabatos de calter tormentosu que vendrán acompangaos de truena y xarazu nel llitoral, nevando abondosamente nel interior d’Asturies perriba de los 300-400m con desplomes de la cota de nieve nos valles de la metá sur d’Asturies. Les temperatures siguen en descensu y l’aire sedrá de componente norte con dalguna racha moderada en zones altes y nel llitoral.
- El martes seguirán los xarabatos frecuentes durante tol riscar y l’alborada pa dir remitiendo a partir del mediudía con nevaes copioses perriba de los 300-400m pudiendo baxar n’alborada hasta los 200m. con unes temperatures que van caltenese mui fríes y mos dexarán un ambiente puramente ivernal.
