https://www.facebook.com/bgvilladexixon
Banda de Gaitas Villa de Xixón
La Banda Gaites Villa de Xixón collabora con Carlos Núñez nel so conciertu en Xixón. Más de cincuenta componentes d’esta formación van xubir al escenariu xunto col míticu gaiteru gallegu pa interpretar dellos temes. Musicasturiana.com
El Teatru Xovellanos de Xixón acueye esta tarde un conciertu de Carlos Núñez dientro de la xira que’l míticu gallegu ta faciendo pol 30 aniversariu del so aclamáu discu Irmandade das Estrelas. Na cita va tener muncha presencia la Banda Gaites Villa de Xixón, la so filial –Banda Infantil La Magüeta-, y el so director José Luis Garcia. Alredor de 55 componentes d’esta formación van andechar col músicu vigués acordies a les collaboraciones y l’amistá que dende hai más de quince años caltienen con él.
«Vamos tocar tola banda seis temes, van tocar La Magüeta un par de temes y yo voi tocar otros tres temes con él», desplica José Luis García sobre la collaboración de güei. El director de Villa de Xixón destaca qu’una de les pieces que va tocar ye «‘Xana‘, una versión del ‘Chalaneru’ que yá ficiera Xuacu Amieva con él». La rellación ente la banda asturiana y Carlos Núñez vien dende un conciertu que ficieron na playa d’El Natahoyo hai más de quince años: «Tenemos bastante sintonía en cuantes a la gaita; coincidimos en Vigo, en Nueva York… intentamos ponenos al día y él siempre ta encantáu de tirar de nós cuando vien a Xixón», desplica García sobre los puntos en común que caltienen con esti gaiteru col que tamién collaboraron fuera d’Asturies.
Con toles entraes agotaes, Carlos Núñez va poner n’escena esta tarde lo que García define como «un show que tresmite muncho» y nel que tán «encantaos de participar». «Irmandade das Estrelas ye una obra d’arte y de xuru que va dir muncha xente de la mio xeneración», conclúi el director de Villa de Xixón.
