Vamos empecipiar el día con nubosidá pero con escasa probabilidá de precipitaciones. Conforme meyora la mañana, y sobremanera a partir del mediudía, van entrar agües pel oeste que se van dir estendiendo por tola rexón. Estes precipitaciones van dexar nieve a partir de los 700 metros con enclín a xubir hasta los 900 o 1000 metros nel tramu final de la xornada. Los vientos van predominar de suroeste con raches moderaes que van poder ser localmente fuertes especialmente na mariña, anque tamién se preven raches bien significatives en zones altes del occidente y nel cordal.
Na mar va tar activáu, per parte de l’Axencia Estatal de Meteoroloxía, l’avisu naranxa mientres tol día por foles d’hasta 7 metros d’altor. Amás, tamién va tar activáu l’avisu por raches fuertes de vientu. Tocantes a les temperatures, nin les máximes nin les mínimes van variar respectu al vienres. Sía que non, podría producise dalgún descensu bien llixeru en zones del oriente asturianu.
El domingu prevese tamién *nubosidad con posibilidá de bastios que van dexar nieve a partir de los 700/800 metros. Los vientos van soplar de suroeste-oeste con raches fuertes en munchos puntos del Principáu. Atención na mar porque les foles podríen llegar a los 8 metros d’altor. Les temperatures máximes van xubir llixeramente ente que les mínimes van fecelo de forma muncho más destacada.
