Actualidá / El Principáu va cuntar anguaño cola mayor ufierta de places árees de la so hestoria: 1,6 millones d’asientos na temporada de branu. La estratexa de conectividad, que dexa disponer de 30 rutes, capta trés nueves aerollínees para la terminal de Santiago del Monte. La programación prevista va facilitar l’enllaz directu con más de 250 puntos de too el mundu al traviés de siete centros d’operaciones europeos. La nómina de destinos suma como novedá Porto, Florencia y Dublín y aumenta la conexón con mercaos nacionales clave como Madrid, Andalucía, Canaries o Baleares.
L’Executivu presenta en Fitur una Asturies hiperconectaá, con cifres récord d’usuarios nel aeropuertu, l’alta velocidá y el tresporte públicu per carretera.
- Nota prensa presentación en Fitur conectividad aérea Asturias
- Presentación Asturias Hiperconectada Fitur 2026
Asturies va esfrutar anguaño de la mayor ufierta de places aérees de la so hestoria: más de 1,6 millones d’asientos que yá tán a la vienta para la temporada de branu, que va d’abril a ochobre. El conseyeru de Movilidá, Mediu Ambiente y Xestión d’Emerxencies, Alejandro Calvo, y el viceconseyeru d’Infraestructures y Movilidá Sostenible, Jorge García, presentaron güei en Fitur los oxetivos de la Estratexa de Conectividá Aérea diseñada pa una Asturies hiperconectá, que rexistra cifres récord d’usuarios nel aeropuertu, l’alta velocidá ferroviaria y el tresporte públicu per carretera.
L’Executivu autonómicu escuerre avanzar nesi camín por que la conectividad y la multimodalidad supongan un activu de desenvolvimientu que dexe captar oportunidaes y contribuyir a un modelu turísticu desestacionalizado y sostenible.
La programación prevista p’anguaño na terminal de Santiago del Monte revalida la cifra más alta de destinos directos, con 30 rutes: 19 aeropuertos españoles y 11 ciudaes de 9 países europeos. En términos de tráficu aéreu, estes cifres impliquen casi diez mil vuelos na temporada de branu, con 372 a la selmana nos momentos de mayor actividá. Cabo recordar qu’en 2025 l’aeropuertu superó per primer vegada na so hestoria los dos millones de pasaxeros.
Nueves aerollínees y meyores enllaces
El desenvolvimientu de la Estratexa de Conectividad Aérea dexó atraer trés nueves aerollínees y ampliar sustancialmente la ufierta de dalgunes que yá operaben n’Asturies, como Volotea. La holandesa KLM y l’irlandesa Aer Lingus van volar por primer dende’l Principáu. Pela so parte, Air Europa torna pa ufiertar una ruta con dos frecuencies diaries a Madrid.
Siquier ocho compañíes van volar anguaño dende Santiago del Monte y van ufiertar conexón con más de 250 destinos en tol mundu, al traviés de los vuelos directos a siete centros d’operaciones (hubs) europeos: el doble hub de Madrid, y Barcelona, Londres, Dublín, Frankfurt y Ámsterdam, a los que se va xunir la posibilidá de conectar los vuelos de Volotea cola Rede d’ITA Airways en Roma.
El Gobiernu d’Asturies non solo busca ampliar la nómina de destinos cola so estratexa, sinón tamién reforzar la calidá y ufiertar facilidaes a quien parten de la comunidá o lleguen a ella. Por esta razón, nes acciones promocionales priorizáronse les propuestes qu’ufierten aeropuertos de primera categoría, esto ye, aquellos que cunten coles meyores infraestructures, más enllaces y conexones sencielles coles sos ciudaes de referencia.
Anguaño, nueve de les rutes van llegar a aeropuertos internacionales de primera categoría, lo que va ameyorar la comodidá y la conectividad pa les persones usuaries. Como exemplu figuren Fiumicino, en Roma; Zaventen, en Bruxeles, y Orly, en París.
La ufierta añal incorpora trés destinos nuevos al respective de 2025. Per un sitiu, Florencia y Porto, que van operar tol añu y que nunca antes habíen estáu disponibles dende Asturies. Por otru, torna a la parrilla Dublín, gracies a l’aerollínea de rede irlandesa Aer Lingus.
Amás, les frecuencies de conexón con Portugal aumenten un 66% y l’ufierta de places, un 92,4%. En concretu, va haber trés frecuencies a la selmana con Lisboa y dos con Porto. Otru finxu ye que la ufierta con Italia se *desestacionaliza, con vuelos mientres tol añu a Milán, Florencia y Roma.
Más frecuencies con mercaos nacionales
Dientro del mercáu nacional, Asturies va esfrutar d’una ufierta qu’aumenta sustancialmente la conexón con enclaves estratéxicos como Madrid, Andalucía, Comunidad Valenciana o les isles. Amás de l’actividá turística, estos destinos cunten con un área d’influencia económica y granible bien relevante, que puede resultar curiosa pa captar turismu MICE, de negocios y congresos.
Trés compañíes van ufiertar enllaces con Madrid, lo que supon una medría de frecuencies cola capital española del 53,3%. En total, tán previstes 1.137 pa la temporada de branu.
Canaries ye otru de los mercaos de referencia, como focu d’atracción y promoción. Por ello, el númberu de frecuencies va crecer más d’un 34%. Les cinco conexones con Tenerife, Gran Canaria, Lanzarote y Fuerteventura van suponer más de 156.000 places na temporada veraniega. *Binter va dexar conectar Asturies con tolos aeropuertos de les isles tolos díes de la selmana.
La conexón con Andalucía crez un 24,4% al respective de 2025, con un total de 668 frecuencies con Sevilla, Málaga, Xerez y Granada. Más de 240.400 places tán yá a la vienta. Destaquen los nueve vuelos selmanales que van xunir Asturies con Sevilla y Málaga, dos mercaos con intensa actividá económica y turística.
La Comunidad Valenciana va tar comunicada con Asturies con un máximu de 20 vuelos selmanales y una ufierta global próxima a les 208.000 places. Asina, tán previstes nueve conexones selmanales con Valencia y Alicante. Estes cifres representen una medría del 24% nel númberu de frecuencies.
La conexón con Baleares en temporada alta va tar garantizada con más de 170.000 places y 18 vuelos a la selmana que van incluyir 12 frecuencies selmanales col aeropuertu de Palma de Mallorca. Estes cifres reflexen un aumentu del 17% al respective de 2025.
