Vamos amanecer con estabilidad pero, a lo llargo de la mañana, va dir entrando nubosidad pel oeste que va dexar precipitaciones. Estes agües van empezar a afectar al terciu occidental antes del mediudía. Mientres les siguientes hores dirán moviéndose por tola rexón anque van dir perdiendo fuerza conforme vaigan averándose escontra l’oriente. Pasada esta masa d’agües, van abrise claros pero rápido volverá aumentar la nubosidad pel oeste y nueves precipitaciones van empezar a percorrer el Principáu. dirección esti.
La cota de nieve va rondar los 1200 o 1300 metros al mediudía, pero a lo llargo de la tarde-nueche dirá esbarrumbándose hasta los 600 metros d’altor. Los vientos van soplar de suroeste-oeste con raches moderaes que podríen ser localmente fuertes sobremanera en zones elevaes del occidente, tamién nel cordal y, poques gracies, na mariña.
Ye por ello polo que l’Axencia Estatal de Meteoroloxía va activar l’avisu mariellu nel suroeste, cordal y mariña occidental hasta’l mediudía por raches d’hasta 90 km/h. Ye importante mentar que dellos modelos meteorolóxicos agoren raches bien fuertes de vientu en tola mariña mientres les últimes hores del vienres.
Podríen algamar, ya inclusive superar localmente, los 100 km/h. Amás, tamién va tar activáu mientres tola xornada l’avisu naranxa na mar por foles d’hasta 7 metros d’altor. Les temperatures máximes van baxar 2 o 3 ºC a lo sumo, y les mínimes apenes van variar respectu al xueves.
