La foca varada en Cadavedo empecipia la so recuperación nel Acuariu de Xixón: «Yá come por sí mesma y ye bien bona señal». La cría ye un machu que tien neumonía ya ingresó con 17 quilos. Recibe tolos cuidos veterinarios que precisa n’una cuba en secu con focos de calor y l’oxetivu ye devolvela al mediu marín nun plazu máximu d’un mes. El Comercio
Podríen bautizalu como ‘Regalín’, porque apaeció la pasada fin de selmana varada na sablera de Cadavedo n’un chisgo a les fiestes de La Regalina y a la ermita del mesmu nome de la localidá valdesana. Sicasí Susana Acle, directora de Bioloxía, Veterinaria ya Investigación del Acuariu de Xixón, asegura atayante qu’a la cría de foca gris que tienen nes sos instalaciones «nun se-y pon nome». «Eso ye humanizala y equí ta por que se ponga sana cuanto antes y devolvela al mediu marín».
Ese equí ye’l Centru de Recuperación d’Animales Marinos d’Asturies (CRAMA) y la nueva inquilina (en realidá ye inquilín porque ye un machu) ye la primer foca que se trata nel centru dende la so puesta en marcha en 2023. A Xixón llegó procedente del Centru de Recuperación de Fauna Montesa del Principáu, en Sobrescobiu, onde se-y fixeron les primeres auscultaciones y plaques pa conocer el so estáu de salú.
La cría de foca ensin nome comparte espaciu con 29 tortúes bobes mediterránees na mesma instalación, anque nesti momentu ta aisllada nuna cuba en secu con focos de calor que xeneren una temperatura constante ente 18 y 22 graos. Susana Acle y l’otra veterinaria que tien al so cargu, Laura Marcos, tán entornaes nel sanamientu de la pequena foca qu’ingresó a principios de selmana bien debilitada con 17 quilos de pesu y síntomes de neumonía. «Empezó yá a comer por sí mesma y eso ye bien bona señal. Ponémos-y una bandexa con agua de mar con pexe (capelín y bocartes) y taramia», espliquen.
En paralelu, tán tratando de la so infección respiratoria con antibióticos y procuren que tea hidratada. Tamién lu realicen analítiques periódiques pa monitorizar el so ameyoramientu. De normal el CRAMA recibe visites sobremanera de neños, p’actividaes divulgatives de colexos, pero desque ta la foca l’accesu ta acutáu y fálase en voz baxa pa nun alteriar al fráxil animal.
Susana calcula que l’exemplar acoyíu tien ente dos y trés meses, vien de les colonies de les mariñes atlántiques del norte y dixebróse de la so madre tres el treslleche. Llegó exhausta y bien delgada a agües de la mariña asturiana en nadando cientos de kilómetros y coles vicisitúes de les condiciones del mar. «Lo anormal ye que lleguen a la sablera y queden varaes», apunta.
L’oxetivu agora ye que respuenda a los tratamientos, gane pesu de forma rápida y nun s’afaiga en nengún momentu a la so vida en cautividá porque l’oxetivu principal ye la reintroducción nel mediu marín por que pueda desendolcase como’l restu d’exemplares de la so especie. Nel Acuariu de Xixón confíen en que’l Principáu vuelva a por ella pa soltala n’alta mar nel plazu máximu d’un mes.
