El colexu rural Ríu Cibea recrea un “antroiro” d’antaño y llevar a dos pueblos cangueses: “Esto ye lo más grande qu’hai”. El centru rescató de la memoria al “pachuzo”, el personaxe tradicional de la mazcarada que percorría Llamera y Sonande abriendo la comparsa. RTPA Reel / Galería / LNE
El “pachuzo” volvió percorrer les cais de los pueblos de Llamera y Sonande, en Cangas, gracies al colexu rural arrexuntáu (CRA) Ríu Cibea. Esti personaxe tradicional yera l’encargáu d’abrir la comparsa d’antiguo y diba vistíu con pieles d’oveya y faciendo sonar les llueques que lleva ataos a la cintura. Nestos pueblos cangueses yá pocos tienen na so memoria habelo vistu y los que sí, son alcordances d’infancia o de relatos de los sos mayores.
D’eses remembranzas tiraron nel centru escolar, con escueles en Llamera, Carballo y Limés, para recrear al personaxe que na mano portaba un “pachizo” de paya de centenu, qu’antaño solía llevar con fueu. Coles mesmes, los escolares, docentes y tamién munchos padres completaron la comitiva con otros personaxes típicos de les mazcaraes: filanderas, cardadores, dames, galanes, cíngaras, cures, la preñada, el médicu o’l bascachón, que tamién lleva chuecas, un caperucho y el bascacho, que d’antiguo se faía con cañes de xardón.
Toos ellos desfilaron al son de la música de la gaita, el tambor y l’acordión, amás d’arrincase baillando con dalguna jota y son d’enriba.
