Esti vienres depáranos el pasu d’un frente fríu mientres la mañana. Va entrar pel oeste asturianu y va dise moviendo por tola rexón col intre de les hores. La nubosidá rápido va dise estendiendo hasta cubrir por completu’l Principáu. Estes nubes van dexar precipitaciones, polo xeneral débiles, pero que van ser más frecuentes pela mañana. A lo llargo de la tarde, entá vamos poder esperar delles agües pero van tender a unviar. Ello ye que prevese l’apertura d’escamplaes nel cielu a la fin del día.
La cota de nieve va tar percima de los 2000 metros pela mañana y va dir baxando pela tarde anque les precipitaciones van ser cada vez menos probables. Los vientos van empezar soplando de suroeste y van dir rolando a oeste mientres el día con raches moderaes a lo sumo y que van ser daqué más significatives sobremanera na mariña. Les temperatures máximes van baxar más de 6 ºC respectu al xueves na metá sur, ente que na metá norte van baxar ente 3 y 5 ºC. Les mínimes van caltenese.
El sábadu prevense intervalos nublos polo xeneral y, anque ye poco probable, nun se refuga que pueda escapase dalguna gota puntual mientres el día. Los vientos van ser fluexos y les temperatures van baxar bien llixeramente.
