Restos de luxu topaos n’Asturies camuden tolo creyío hasta agora sobro l’aristocracia del Imperiu Romanu.
L’arqueólogu Diego Piay Augusto, profesor de la Universidá d’Uviéu, dedícase dende va tiempu al estudiu de les villes romanes.
Anguaño atópase escavando n’Italia. Esti oficiu y esta relación estrecha cola arqueoloxía civil fíxo-y preguntase va tiempu por qué habiendo más d’un centenar de villes romanes ente Galicia y Asturies, solo hai dos que son visitables, les que realmente fueron investigaes col rigor arqueolóxico que se rique: la de Toralla, en Vigo, y la de Veranes, en Xixón. «Munches vegaes dando clase pregunto a los alumnos poles villes romanes y saben dicime una o dos como muncho, nun hai conocencia».
✒️ Manuel Noval / La Voz
Piay fixo un estudiu fondu de la situación d’estes villes nel noroeste y, revisando inventarios arqueolóxicos, noticies y afayos publicó un artículu tituláu «Afata urbana nel finis terrae: delles observaciones sobro les élites y los elementos de luxu nes villes romanes del noroeste d’Hispania», nel que llega a una conclusión interesante: que’l noroeste peninsular ta bien llueñe de la imaxe de periferia atrasada cola que cargó mientres muncho tiempu.
Yera, sicasí, un territoriu con élites capaces de vivir y esibise con refinamientu, daqué que ta empezando a midise colos distintos afayos arqueolóxicos. L’estudiu propón que les villes de Galicia y Asturies fueron pieces clave na organización del territoriu y nuna cultura de prestíu que compartíen.
L’arqueoloxía dexa sofitar esta tesis al traviés de diversos elementos de luxu topaos en villes rurales: mosaicos, pintures murales, restos d’espacios termales y, en menor midida, escultures. Esos materiales yeren indicadores sociales. La sola presencia de toos esos oxetos paez demostrar la esistencia de miembros de clase alta de la sociedá romana nel estremu noroccidental: propietarios con alta capacidá económica que-yos dexaba importar o encargar bienes suntuarios y convertir les sos residencies n’espacios de representación del poder.
Al respective de los materiales topaos nes distintes villes, l’estudiu detecta una preferencia marcada pola policromía, los motivos xeométricos y, de forma bien llamativa, les escenes marines con pexes y moluscos. Esi enclín polo marino podría reflexar la importancia económica de la mariña, la pesca y la salazón nes élites del noroeste.
Tocantes a les pintures murales, les pruebes son escases, pero aun así significatives. El trabayu destaca especialmente’l casu de Cambre, onde apaecen techos y parés decoraos con fauna marina y arquitectures pintaes. Finalmente, al respective de la escultura, l’estudiu alvierte de que los exemplos son pocos y dacuando de contestu inciertu, pero, aun así, paecen indicar con abondo fuerza la idea de la llegada de bienes de luxu al noroeste.
L’artículu aprofia qu’estos oxetos funcionaríen como elementos de «ostentación, autorrepresentación, identidá y riqueza». Anque les villes del noroeste paecen menos monumentales qu’otres grandes villes hispanorromanes, eso nun significa probeza nin marginalidad, sinón más bien un desenvolvimientu distintu ya inda mal conocíu pola falta d’escavaciones sistemátiques.
