Les precipitaciones del xueves fueron, tal que taben previstes, bien abondosos n’Asturies. Concretamente, Uviéu foi la estación meteorolóxica asturiana de AEMET que más precipitación atropó mientres el día superando los 30 llitros per metro cuadráu. El vienres les precipitaciones van siguir presentes pero van dir de más a menos. Entá pela mañana van poder ser abondosos pero van dir perdiendo intensidá conforme vaigan trescurriendo les hores. Comoquier, hasta les 22:00 hores de la nueche entá va tar activáu pola Axencia Estatal de Meteoroloxía l‘avisu mariellu en tol Principáu por importantes precipitaciones. Amás, tamién va tar activáu l’avisu mariellu na mar por posibilidá de foles d’hasta 5 metros d’altor.
Tocantes a les temperatures, yá baxaron de forma importante, pero’l vienres volver a faer. Les máximes van baxar de forma xeneralizada, sobremanera nel interior. Nel casu de les mínimes, el descensu va ser llixeru. Por cuenta de la baxada de temperatures la cota de nieve tamién lo fadrá. Les precipitaciones van dexar nieve a partir de los 900/1000 metros d’altor. Los vientos van soplar de componente norte tendiendo a afitase de noroeste a la fin.
