L’institutu qu’anguaño se llama «La Florida», nesi barriu uvieín, va llamase «Xuan Bello», n’honor y acordanza d’ún de los meyores escritores que dio la lliteratura asturiana de toles dómines.
Con esti motivu, dirección, profesores y alumnos movilícense p’asumir una identidá que los va singularizar ente los IES d’Asturies, y al mesmu tiempu van amestase al grupu de los centros d’enseñanza que lleven nomes d’escritores ilustres.
El pasáu llunes 23 de marzu del 2026, l’institutu «Xuan Bello» (permitíime que yá lu llame asina) convidóme a un actu colos alumnos onde tuvi ocasión d’esplica-yos por qué ye un aciertu da-y a un institutu’l nome de Xuan Bello, y glosé la figura del que foi un escritor relevante y amigu personal. Los rapazos fixéronme preguntes mui interesantes alredor del escritor de Paniceiros.
Pa dase cuenta de cómo nel institutu tán trabayando les coses, vei esta secuencia de semeyes:
1. Entrada al actual IES «La Florida».
2. Programa d’actos que van tener llugar el próximu 10 d’abril nel teatru de Pumarín d’Uviéu, basaos n’obres de Xuan Bello.
3. Nun espaciu del institutu, y xunto a un retratu de Xuan Bello na pantalla, na paré tán pegaes semeyes de cases qu’apaecen nos relatos del escritor, colos sos nomes. Hai tamién una maqueta de Paniceiros fecha polos alumnos.
4. Detalle de la maqueta de Paniceiros, el pueblu de Tinéu al que Xuan Bello dio sonadía universal.
5. Los rapazos del institutu enantes d’entamar l’actu.
6. Enantes del actu, charrando con María Cotiello, profesora del institutu.
7. En plenu falamientu a los rapazos del institutu, esplicándo-yos la figura de Xuan Bello.
