Güei celébrase’l Día Mundial de Concienciación sobre l’Autismu. Una xornada pa dar visibilidá y reivindicar los derechos de les persones con Trestornu del Espectru Autista. Sol lema ‘Menos xuicios, más sofitos’, asociaciones, como ADPA, reclamen más recursos y una mayor implicación de les alministraciones y la sociedá p’avanzar hacia una inclusión real.
N’Asturies, l’autismu sigue necesitando más sofitos y recursos. Dende ADPA, l’Asociación polos Derechos de les Persones con Autismu, quixeron reivindicar meyores n’ámbitos clave como la educación, la sanidá y los servicios sociales.
Anque la concienciación avanzó nos últimos años, afiten qu’entá esiste un gran desconocimientu sobre l’autismu.
En Siero, el Conceyu sumóse a esta xornada instalando estes pancartes con mensaxes escritos en castellanu que dicíen ‘La inclusión xúnenos’, ‘La empatía ye’l principiu’ o ‘Caín ye especial y toos cuntamos’, ellaboraes por alumnáu del colexu Peña Careses nun taller sobre la importancia de la empatía.
Un pasu más pa visibilizar l’autismu y avanzar hacia una sociedá con menos xuicios y más sofitos.
