El Muséu de los Países Celtes de Villa, en Corvera, celebra’l so primer aniversariu con 1.800 visites. Bras Rodrigo Álvarez Prieto, director del centru, entama ampliar les colecciones incorporando traxes y gaites tradicionales d’otres naciones celtes. Les entraes cuesten cinco euros y los menores de dolce años tienen la entrada gratuita. http://www.museupaisesceltes.com/
Una visita escolar al Museu de los Países Celtes. LNE
El Muséu de los Países Celtes de Villa, en Corvera, cumple n’unos díes el so primer añu de vida. El centru museísticu ta dirixíu pela banda de gaites de Corvera que punxo n’usu l’edificiu de les antigües escueles de la parroquia, ensin usu dende va décades. «Tamos bien contentos cola acoyida, la verdá, soi optimista y realmente va bien», señala Bras Rodrigo Álvarez Prieto, director de la banda de gaites y máximu responsable del museín de Villa. Hasta la fecha, el centru recibió 1.800 visites en númberos redondos, una cifra d’asistentes qu’anima a siguir alantre col proyectu.
«Ye una cifra importante teniendo en cuenta dellos factores: nun ye un muséu convencional y atendemos con visites alcordaes al traviés de corréu electrónicu», señala’l director de la banda de gaites de Corvera, que yá atendió a visitantes d’un autobús llegáu de Llión, a turistes madrilanos y a la mayoría asturianos que quieren conocer un poco más de los raigaños tradicional y célticu de la rexón. Pero non solo d’Asturies, tamién d’otros pueblos hermanos del Arcu Atlánticu como Galicia, Escocia, Irlanda, Gales, Cornualles, Bretaña y l’Isla de Mann.
Unos neños fotografíense énte’l gaiteru de la fachada. / B.R.
Otra de les peculiaridaes d’esti muséu, que ye’l primeru de la hestoria de Corvera, ye’l so allugamientu nuna redolada rural. «Los visitantes cuando vienen lo primero fáense una semeya nel gaiteru que tenemos fora del edificiu y tamién tomen otra de la sierra de Van Bufar», esplica Bras Rodrigo Álvarez Prieto, qu’entiende qu’el museín ye daqué vivu y pollo nun refuga ampliar les colecciones.
En mente yá tien incorporar los traxes tradicionales de les naciones celtes de Gales, Isla de Mann, Galicia y Cornualles, y lo mesmo coles gaites. «Fáltennos les gaites manesa, galesa y de Cornualles», detalla.
Esti centru tien como idea principal combinar los recursos propios, esto ye, financiase col dineru de les entraes, al pie de les aportaciones municipales y fondos europeos.
La cabana celta, próximu oxetivu
La propuesta de la banda de gaites de Corvera ye siguir ampliando los sos recursos y non solo ocupar l’interior del edificiu, sinón tamién la parte esterior. Una idea que ronda la cabeza del colectivu promotor del Muséu ye la recreación d’una cabana celta, un teito similar a los de Somiedu, para dar a conocer el llar de los antiguos pobladores. «La nuesa intención ye cuntar con esi teito anguaño», señaló’l director de la banda de gaites de Corvera, que sigue incorporando figures de gaiteros a la peramplia colección que puede esfrutase nel local de les antigües escueles de Villa
