Actualidá / Cartel Selmana Lletres
El Principáu dedica la 47 Selmana de les Lletres asturianes a Taresa Cónsul y al teatru costumista asturianu. La XLVII edición va rindir homenaxe a la primer dramaturga conocida en llingua asturiana y al teatru popular como espresión cultural y llingüística. La programación inclúi más d’una ventena d’actividaes en 14 conceyos, con espectáculos escénicos, conciertos, alcuentros y propuestes divulgatives. El ciclu va llevase a cabu ente finales d’abril y el 10 de mayu y va contar con producciones propies, estrenos y materiales conmemorativos.
La Conseyería de Cultura, Política Llingüística y Deporte diseñó una amplia programación pa la XLVII Selmana de les Lletres Asturianes, que nesta edición rinde homenaxe a Taresa Cónsul, considerada la primer dramaturga conocida en llingua asturiana, y al teatru popular o costumista asturianu, un xéneru de raigañu centenariu que desempeñó un papel esencial na tresmisión cultural y llingüística d’Asturies y pal que, amás, la conseyería ta tramitando l’espediente pa la so declaración como Bien d’Interés Cultural (BIC).
La Selmana de les Lletres concíbese como un homenaxe doble: per un llau, la recuperación y puesta en valor de la figura de Taresa Cónsul, monxa benedictina del monesteriu de Santa María de la Vega (Uviéu), autora d’un entremés n’asturianu representáu en 1789; y, per otru, el reconocimientu al teatru costumista, o popular, asturianu como fenómenu escénicu y social que supo consolidar públicos y adaptase a los nuevos llinguaxes escénicos ensin arrenunciar a la so identidá.
La programación, coordinada por Adolfo Camilo Díaz y Laura Iglesia, de la que les feches y hores concretes van publicase próximamente, estructúrase alredor de tres exes fundamentales: la figura de Taresa Cónsul, la contribución de les muyeres al teatru asturianu y la evolución del teatru popular dende los sos oríxenes hasta l’actualidá. El programa va
desplegase en 14 conceyos y va axuntar más de venti actividaes, ente representaciones teatrales, conciertos, meses redondes, conferencies, visites y acciones performatives.
Ente les propuestes destacaes figuren el Conciertu de les Lletres Asturianes, a cargu de la OSPA y el Coru León de Oro; l’actu institucional de la Selmana; l’estrenu de delles producciones escéniques creaes espresamente pa esta edición, como’l Proyectu Cónsul de microteatru o la obra A min nada m’in-Theresa; asina como un musical contemporaneu, rutes y visites dramatizaes y un flashmob participativu.
Como ye yá tradición, la Selmana va cuntar amás con una cuidada producción editorial y audiovisual, ente la que destaca’l llibru conmemorativu De viva voz. Taresa Cónsul y el teatru asturianu, un facsímil del manuscritu del entremés de l’autora, estudios históricos y lliterarios, asina como’l documental A la lluz de la solombra, dedicáu a l’autora y al contestu de la escena teatral asturiana del so tiempu.
La XLVII Selmana de les Lletres Asturianes inscríbese na estratexa del Gobiernu d’Asturies pa promover la llingua asturiana y l’eonaviegu, favorecer l’equilibriu territorial y garantizar los derechos llingüísticos y l’accesu universal a la cultura, reforzando al tiempu l’apoyu a la creación contemporánea y al texíu cultural de la comunidá autónoma.
