El 9,5% del alumnáu de Primaria afirma sufrir acoso escolar. RTPA Les investigaciones disparen un 130% n’Asturies en cuatro años, anque solo una minoría confírmase. El 9,5% del alumnáu de Primaria d’España afirma sufrir acoso escolar y casi el mesmu porcentaxe, un 9%, ciberacoso, según el Ministeriu d’Educación. Güei ye’l Día Internacional contra’l Bullying, un problema que los centros traten d’atayar activando protocolos. N’Asturies disparáronse les investigaciones por acoso. Crecieron un 130% nos postreros cuatro cursos. Pasó de 168 investigaciones abiertes en 2021 a 392 el cursu pasáu. Sicasí, son una minoría los que se confirmen. Nel cursu 24-25 fueron 42 de 392, solo un 10%. #DíaInternacionalContraElAcosoEscolar 
#StopBullying
- Combatir l’acoso escolar tien d’implicar a tola sociedá. Énte cualquier niciu: #stopbullying
- Principado de Asturias / entrada IXUXÚ / Reel n’asturianu / IXUXÚ
La conseyera d’Educación, Eva Ledo, ve posible allixerar más la carga burocrática que traen los protocolos, procedimientos que pueden durar dos meses y arreyar hasta una trentena de persones. Yá se tomaron midíes pero podríen retayase dellos pasos más na fase inicial, tal que demanden los inspectores.
María sufrió acoso dende Primaria hasta la ESO. En 4º de Primaria’l cuerpu de María González empezó a camudar y ende empezaron los problemes. «Les mios amigues dexaron de selo y volviéronse les mios acosadores», señala. Cuando llegó a la ESO, el bullyng siguió y acabó pensando que’l problema yera ella mesma. Sintió que precisaba pidir ayuda profesional. «Foi como un reafitar qu’igual el problema yera yo», señala.
Álex de Sousa, coordinador de ITA Moscatelar asegura que del bullyng sálese y les persones pueden volver construyir el so conceutu y ameyorar l’autoestima. «Tou ella precisa d’un trabayu y d’acompañamientu», asegura. Los espertos encamienten, rodase de persones que te quieran.
El bullying ye una forma de violencia que puede tener graves consecuencies para’l desenvolvimientu emocional de les víctimes. Esta forma d’acoso produzse cuando un neñu, neña o adolescente ye sometíu de forma repitida ya intencional a agresiones físiques, verbales o psicolóxiques per parte d’otru neñu o grupu.
- Identificar situaciones d’acoso y violencia, fomentando la empatía
- Dexar aprucir sentimientos como’l mieu, el desaliendu o la congoxa y potenciar valores positivos como l’autoestima, la empatía o la solidaridá.
- Tener habilidaes qu’ayuden a denunciar situaciones inxustes.
