Los llibros infantiles y xuveniles más vendíos n’asturianu, agora remocicaos en «Medría», la nueva coleición de l’Academia de la Llingua Asturiana. Nun nuevu formatu vuelven a les llibreríes les obres coles que medraron delles xeneraciones de llectores.
«Los cuentos de Ñuberu» ye’l primer númberu de «Medría», la nueva coleición infantil y xuvenil de l’Academia de la Llingua Asturiana.
Esti volume recueye los cinco llibros espublizaos pola ALLA nos años 80, obra de Miguel Solís Santos: «L’Arcu Iris y Ñuberu» (1982); «Les cuatro estaciones y Ñuberu» (1983); «Los cazadores, los llobos y Ñuberu» (1984); «Los árboles, l’ocalitu y Ñuberu» (1985) y «Ñuberu y la paz» (1987).Nestes aventures que-y pasaron colos sos collacios, el Ñuberu collabora con ellos pa consiguir un mundu más ecolóxicu, pacíficu, afayadizu y feliz. Un llibru bien guapu pa mercar y regalar nel Día del Llibru Asturianu que va celebrase’l vienres 8 de mayu.
¡«El Principín» vuelve a les llibreríes! El clásicu d’Antoine de Saint-Exupéry, qu’hai poco celebró’l 40 aniversariu de la so primer edición n’asturianu, ye’l segundu númberu de la coleición «Medría», que reedita obres infantiles y xuveniles.
Esti llibru, qu’escuende una reflexón fonda sobre la vida, l’amor y l’amistá, sigue siendo güei una obra fundamental pa grandes y pequeños. ¡Una compra perfeuta pal Día del Llibru Asturianu esti 8 de mayu!