Alborecemos col cielu mui nuboso y precipitaciones moderaes ya persistentes con unes temperatures que tan alrodiu de los 9ºC, rexistrándose nel puirtu Payares 0,5ºC onde nieva copiosamente nes zones altes.
Güei vamos tener precipitaciones abondoses ya persistentes hasta’l mediudía, dempués les precipitaciones dirán remitiendo dando pasu a los xarabatos que yá sedrán intermitentes y más espacios pero que puen tener calter tormentosu y venir acompangaos de truena y xarazu. Les temperatures en descensu y la cota de nieve rondarán los 1300-1500m pudiendo baxar na cordelera a los 1000m n’estes primeres hores. L’aire sedrá de componente norte con raches fuertes en zones altes ya en puntos de la costa con tendencia a dir amenorgando durante’l día.
El puertu de Payares nun ye l’únicu afectáu pola acumuladura de nieve, que la so cota asítiase güei en redol a los 1.200 metros. San Isidro, L.leitariegos, Tarna, Somiedu y Ventana, toos na rede secundaria de carreteres del Principáu, tamién tán zarraos al pasu de vehículos pesáu y los turismos tienen de circular con cadenes o neumáticos d’iviernu, según la información del 112 Asturies.
- Mañana sábadu vamos tener el cielu más escampláu pela mañana cola apertura de grandes claros o abancios pa dir aumentando la nubosidá a partir del mediudía y dexanos el cielu cubiertu pela tarde cola posibilidá de dalguna gotera al finar el día. Les temperatures mínimes en descensu, mentantu les másimes tienden a subir.
- El domingu vamos tener el cielu mui nuboso con dalguna precipitación feble en forma d’orpín con un llixeru descensu de les temperatures másimes por mor de la nubosidá, subiendo les mínimes pol mesmu motivu.
- El llunes entovía tendremos dalgo de agua pero poco y paez que’l restu la selmana pue ser soleyera y afayaiza con unes temperatures en bultable ascensu pero esto yá lu diremos viendo.
