- Alborecemos col cielu cubiertu por nubosidá estratificada ya con unes temperatures que tan alrodiu de los 8ºC, rexistrándose nel puirtu Payares -0,4ºC.
- Güei vamos tener nubosidá estratificada durante la mañana cola apertura de dalgún claru o abanciu. Yá pela tarde van dir desendolcándose les nubes pudiéndo dexanos dalguna gotera o xarabatín feble sobre too na cordelera y al atapecer con unes temperatures másimes n’ascensu llixeru. L’aire sedrá sele ya variable.
- Mañana domingu vamos seguir con nubes nel cielu, dalgún claru o abanciu ya cola posibilidá de dalguna gotera o xarabatín de calter tormentosu a partir del mediudía con unes temperatures que van camudar poco, calteniéndose un ambiente fresco. L’aire seguirá siendo sele ya variable.
- El llunes ya martes, anque ascenderán dalgo les temperatures, nel cielu vamos seguir con nubes, nun descartándose dalguna gotera dispersa ya ocasional, nun sedrá hasta’l miércoles y sobre too xueves cuando l’ascensu sedrá bultable con temperatures másimes el xueves que puen algamar los 30ºC en munches zones del interior asturianu.
- De cara a la fin de selmana paez que s’estropia’l tiempu ya tendremos nubosidá, dalguna tormenta, precipitaciones ya un descensu de les temperatures, pero esto yá lu diremos viendo.
- Ayeri mos sorprendió la nieve, tantu n’intensidá como l’altor al que surdió. Y ye que la persistencia y conveución de les precipitaciones, xunto a la orografía montañosa, favorecieron los desplomes de la cota de nieve na cordelera. Ayeri a 1.500m teníemos unos 0ºC pero la columna d’arie malpenes camudaba lladera abaxu en valles de la cordelera, emburriando’l fríu poles precipitaciones intenses ya persistentes. Cuantu más encaxonáu seya’l valle meyor, menos posibilidaes tien l’aire fríu en dixebrase. Y asina nevaba nel pueblu de Pendones a tan solu 750m nel altu Nalón, mentantu nel picu La Mostayal nel cordal del Aramo, a más de 1.300m, nun s’apreciaba nieve dende Uviéu, cume muncho más abierta y espuesta al vientu impidiendo que l’aire fríu se desplome.
