- Alborecemos col cielu nuboso ya con unes temperatures que tan alrodiu de los 10ºC, rexistrándose nel puirtu Payares 3,1ºC.
- Güei vamos tener nubosidá estratificada cola apertura de dalgún claru o abanciu pero cola posibilidá de precipitaciones febles, disperses ya ocasionales, sobre too nes hores centrales del día. Con unes temperatures que van camudar poco, calteniéndose un ambiente fresco.
- Mañana llunes seguiremos con estratos nel cielu pero cada vegada menos, tando más escampláu na fastera surocidental y cordelera, amás les temperatures van dir subiendo, sobre too en zones de montaña.
- El martes sedrá mui asemeyáu al llunes, nubosidá estratificada con apertura de claros o abancios, tando más escampláu nel surocidente y cordelera con unes temperatures que pali que pali siguen recuperándose.
- Miércoles seguiremos con dalguna nube pero mayoritariamente va tar escampláu n’Asturies y yá con temperatures másimes perriba de los 25ºC, sobre too nel interior onde l’ascensu sedrá bultable.
- El xueves una masa d’aire mui cálida mos invadirá per sur faciendo que les temperatures se disparen hasta los 30ºC o más, dexándonos un ambiente d’auténticu branu. Cabe la posibilidá de que surdar a lu llargu la mañana nublines de advención na primer llinea de costa por mor del contraste de temperatura del mar, entovía fríu, y la tierra que se calez muncho más rápidu.
- El vienres paez que tovía vamos tener un ambiente braniegu con temperatures mui altes y el restu la fin de selmana la llegada d’un embulsamientu d’aire fríu n’altor mos pue dexar xarabatos tormentosos y un descensu de les temperatures, pero esto yá lu diremos viendo.
