- Alborecemos col cielu nuboso ya con unes temperatures que tan alrodiu de los 17ºC, rexistrándose nel puirtu Payares 15,4ºC.
- Güei vamos tener dalgo de nubosidá pela mañana con tendencia a dir dixebrándose durante’l día pa quedar el cielu poco nuboso o escampláu con unes temperatures que van descender llixeramente. Güei nun s’esperen precipitaciones, nin tormentes, dempués del impresionante espectáculo que mos dexaron ayeri.
- Mañana miércoles si que volverán a desendolcase les nubes verticalmente pa dexanos de nuevu xarabatos de calter tormentosu, irregularmente repartios a última hora. Durante’l día la llume del sol y el vientu de componente sur fadrán que se disparen les temperatures con másimes alrodiu de los 35ºC na fastera central asturiana, tando muncho más afayaizu na costa por mor de les brises marines.
- El xueves seguiremos baxo esta situación de fola de calor con sol y temperatures másimes perriba de los 30ºC, nun sedrá hasta’l vienres cola entrada de vientu de componente noroeste cuando les temperatures sufrán un descensu bultable y por fin con unes temperatures másimes que malpenes llegarán a los 25ºC nel meyor de los casos y col cielu ente nubes ya claros.
- Paez que’l sábadu ya domingu la situación sedrá mui asemeyada con intervalos nubosos entemecios ente dellos claros o abancios y temperatures afayaices, pero esto yá lu diremos viendo.
