El blindaxe al asturianu que pretende Barbón: estender el so usu na Alministración (incluyíos conceyos) ensin necesidá de llegar a la oficialidá. La futura llei de Cultura ya Identidá va dexar a los conceyos aprobar, dientro de les sos competencies, planes y ordenances de normalización llingüística. LNE
El PSOE nun tien mayoría parlamentaria necesaria para la reforma del Estatutu y el so apueste entemediu para la llingua causa rocees nos partíos la esquierda y la derecha de los socialistes. El director del Ridea acusa a IX de «sectarismu ya ignorancia» tres la so propuesta de convertir l’organismu n’una Academia de les Artes y les Ciencies Asturianes.
El compromisu d’Adrián Barbón de que la futura Llei de Cultura ya Identidá va blindar l’asturianu asitió l’alderique llingüísticu nun terrén alternativu al de la oficialidá. El Gobiernu del Principáu nun dispon de los sofitos necesarios para reformar l’Estatutu d’Autonomía y reconocer l’asturianu como llingua oficial, polo que ta buscando la fórmula para reforzar la so protección, ampliar el marxe d’actuación de les alministraciones y convertir la política llingüística n’una pieza estable del sistema públicu cultural.
Nun cunta’l PSOE con esa mayoría cualificada abonda, como quedó constatáu’l pasáu branu cola última votación na Xunta para intentar sacar alantre la oficialidá. Por que esta midida sala alantre ríquese’l respaldu de trés quintos de la cámara, esto ye, 27 diputaos. Anguaño, los partíos dispuestos (PSOE, Convocatioria-IX y la diputada Cuadonga Tomé) a sofitar esti cambéu solo suman 23.
Por tanto, Barbón fala d’una fórmula para avanzar dientro de les competencies actuales. La Conseyería de Cultura sostien que la norma va dexar el “máximu desenvolvimientu posible” dientro d’esi marcu y que «va garantizar derechos culturales y llingüísticos», va protexer «les llingües propies como parte esencial de la identidá asturiana» y va dar cobertoria a polítiques de normalización en tol territoriu.
Unu de los puntos más relevantes del planteamientu de Cultura ye’l papel reserváu a los conceyos. La futura llei d’Identidá va reconocer “la capacidá de les entidaes locales para aprobar, dientro de les sos competencies, planes y ordenances de normalización llingüística”. Esi aspeutu abre la puerta a que los conceyos desenvuelvan estratexes propies y coordinaes col Principáu.
La fórmula plantegada agora pol Principáu nun va equivalir a la oficialidá, pero hai que tener en cuenta que tampoco parte de cero. Asturies yá cunta con referencies al asturianu nel so Estatutu d’Autonomía y dispon d’una llei específica d’Usu y Promoción, aprobada mientres la presidencia de Sergio Marqués (PP). La novedá que plantega’l Gobiernu ye integrar esa protección nuna norma de mayor algame políticu y cultural, con vocación d’ordenar el sistema públicu de cultura, reconocer símbolos y señes d’identidá y afitar nueves ferramientes alministratives.
En resume, el blindaxe nun consistiría en reconocer un nuevu estatus xurídicu de la llingua, sinón en dotar de mayor estabilidá les polítiques llingüístiques que pretenden desenvolvese nos próximos años, y que la so fueya de ruta ta recoyida na “Estratexa de normalización”, presentada apocayá más de dos meses. En dichu documentu proponíase, entre otres acciones, enllantar un BOPA billingüe.
Esi diseñu, sicasí, dexa abierta la entruga central: hasta ónde puede llegar una llei autonómica ensin oficialidá. L’Executivu va poder reforzar programes, coordinación, órganos consultivos, planificación y reconocencia cultural, pero nun va poder atribuyir al asturianu los efectos xurídicos plenos que tendría xuna llingua oficial.
El proyectu queda atrapáu entre dos llaos opuestos. Per un sitiu, PP, Vox y Foru tienen rocea del algame políticu del blindaxe. Por otru, Convocatoria-IX y Cuadonga Tomé alverten de que la verdadera protección de les llingües mesmes pasa pola oficialidá.
El presidente del PP, Álvaro Queipo, sostuvo ayeri que l’asturianu yá ta protexíu pol Estatutu y pola Llei d’Usu y Promoción, y pidió al Gobiernu qu’esplique qué significa agora “blindar” la llingua. Reclamó, amás, que una llei d’Identidá y Cultura d’esa importancia” nun sala «d’un despachu con un sesgu sectariu ya ideolóxicu”. Sicasí, dixo, ten de ser compartíu “siquier” col principal partíu de la oposición “para aseguranos de que nun ye un muriu más qu’estreme a los asturianos”.
Pela so parte, Carolina López, de Vox, llevó l’alderique a un planu identitario y acusó a Barbón de querer siguir los modelos catalán y vascu. “El dineru público tien d’invertise nos servicios públicos, non en crear estructures identitaries artificiales que yá nos va costar 55 millones d’euros al añu”, sentenció.
El voceru de Foru, Adrián Pumares, cargó contra la propuesta para la llei fecha por Izquierda Xunida y acusó a Ovidio Zapico de ser “quien atayó la pasada llexislatura la reforma del Estatutu d’Autonomía” por “la so cerrazón a buscar puntos d’alcuerdu que dexaren algamar una mayoría de 27 diputaos, negándose siquier a aldericar cambeos normativos”.
La presión más incómoda para Barbón procede, sicasí, del so propiu espaciu parlamentariu. Convocatoria por Asturies-IX recordó que la llei d’Identidá foi apautada col PSOE a iniciativa de la coalición, pero’l so voceru, Xabel Vegues, avisó de que’l borrador “quédase bien xustu”. IX quier axustar un testu más ambiciosu y reforzar el papel d’instituciones como l’Academia de la Llingua o la RTPA.
Pela so parte, Cuadonga Tomé foi más esplícita: “La meyor manera de blindar les llingües propies ye aprobar la so oficialidá. Cuando hubo posibilidá numbérica pola composición del parlamentu asturianu, el presidente Barbón atrabancó viviegamente esta oportunidá. Son totalmente comenenciosos les sos declaraciones”.
El Ridea, otru focu de conflictu L’alderique llingüísticu quedó amás entemecíu cola propuesta d’IX d’aprovechar la Llei de Cultura ya Identidá para tresformar el Real Institutu d’Estudios Asturianos (Ridea) nuna Academia de les Artes y les Ciencies Asturianes. Un planteamientu llanzáu’l llunes pol conseyeru d’Ordenación del Territoriu y coordinador d’IX, Ovidio Zapico, y ratificáu esti martes pol diputáu Xabel Vegues. “Creemos qu’el Ridea yá cumplió una etapa y agora lo que tenemos que crear ye una Academia de les Artes y les Ciencies Asturianes”, aportunó.
El director del organismu, Ramón Rodríguez, respondió acusando a Zapico de “sectarismu ya ignorancia”. Pero, sobremanera, defendió una llabor de 81 años d’hestoria que “nun conocen” porque “nunca los vi en nenguna de les sos actividaes”. “El Ridea ocúpase de too lo que ye importante para Asturies, dende la conocencia de la so hestoria, el so arte, la so llingua, les sos costumes y la so economía hasta problemes del máximu interés para los asturianos de güei, como la sanidá, la demografía, la industria, la minería, la ciencia, la tecnoloxía…”, destacó Rodríguez.
Queipo avisa a Barbón: la llei de Cultura ya Identidá hai de ser consensusada «col principal partíu de la oposición» por que nun tenga «sesgu sectariu»
Barbón quier «blindar» l’asturianu cola llei de Cultura ya Identidá: «Ye protexer la nuesa identidá y sentíu de pertenencia».
Coles mesmes, llamentó tamién que va cuatro años, cuando s’aprobó la llei del Ridea, cuntó col respaldu total d’IX, non solo cola so votación a favor, sinón “con tou aquello que plantegamos”.
