Diálogos d’obres nel Belles Artes sobre temes contemporáneos.
El Muséu de Belles Artes estrena una de les llinies estratéxiques de la so nueva etapa, con María López Fanjul na dirección. Quier ufiertar llectures anovaes de los fondos del muséu. Güei inauguróse la primer esposición d’esti estilu.
Per primer vegada, l’equipamientu entemeció obres de tola colección, de siete sieglos y rompió l’orde tradicional d’exhibición. La resultancia na planta -1 del muséu.
Un espeyu del sieglu XVIII arrodióse d’obres de distintes dómines. Convídanos a miranos, inclusive a faenos un ‘selfie’ cabo autorretratos d’artistes consagraos como Piñole o Darío de Regoyos, pero tamién d’otros emerxentes, como los asturianos Chechu Álava o Carmen Santamarina.
Na so nueva y atrevida propuesta, el Belles Artes aborda temes d’actualidá como la esmolición pola imaxe.
N’otra paré, un Zurbarán comparte espaciu con un cuadru de Ricardo Villoria. El primeru retrató a un personaxe históricu del sieglu d’oru, el segundu a un obreru asturianu.
Arte que conecta y que cunta hestories. De la gran colección del muséu escoyéronse un centenar de pieces, tou un retu pal equipu.
Ye un planteamientu pioneru n’España, esplica la directora, que se valió del so bagaxe internacional pa cambiar enfoques. Abre infinites posibilidaes a les 20.000 pieces del equipamientu.
Tán los artistes más importes de la colección, Goya, Sorolla, El Greco y Picasso, pero tamién munchu talentu asturianu.
