L’oxetivu d’UNICEF ye llevar les firmes al Mobile World Congress de Barcelona en 2027. Pues participar nesti enllaz: https://firmas.unicef.es/algoritmoseguroya
UNICEF España asoleyó apocayá un informe detalláu sobre’l bienestar dixital na infancia y l’adolescencia, poniendo sobre la mesa una realidá esmolecedora: el 82,4% de los menores yá dispón de teléfonu móvil, de media dende los 10,8 años d’edá. Esti estudiu, que cuntó cola participación de más de 93.000 estudiantes en tol Estáu, sirvió de base pa llanzar la campaña “Nun dexes que l’algoritmu los controle”, cola que se busca esixir a les compañíes teunolóxiques un diseñu más responsable y tresparente.
Una xeneración perconeutada. Los datos del informe son claros: la dixitalización ye yá una tresformación estructural de la sociedá que condiciona la identidá de los más mozos. Según la investigación, el 92,5% de los adolescentes tán rexistraos n’a lo menos una rede social, y un 75,8% participa en trés o más. Esta conexón constante traduzse n’hábitos que puen afectar a la salú, como’l fechu de que’l 41,2% duerma col móvil na so habitación, y munchos d’ellos úsenlo de madrugada.
Impautu na salú mental y riesgos online. La organización sorraya que l’usu intensivu de les pantalles ensin acompañamientu tien repercusiones direutes na salú pública. L’estudiu revela que’l 14,2% de los adolescentes presenta síntomes de malestar emocional, rellacionaos con niveles d’ansiedá y depresión. Amás, el riesgu de suicidiu multiplícase ente quien sufren ciberacosu, un problema qu’afecta al 8,3% de los escolares.
Otros datos relevantes amuesen una realidá complexa:
– El 31,3% de los adolescentes que tuvieron pareya sufrieron dalguna forma de violencia dixital (control de redes sociales o revisión del móvil ensin permisu).
– El 29,6% vio pornografía, asitiándose la edá media del primer accesu nos 11,5 años.
– Un 11,1% de los menores reconoz apostar o xugar dineru n’Internet o de forma presencial.
L’ofensiva contra los algoritmos Ante esti panorama, UNICEF España punxo en marcha la iniciativa “Algoritmu Seguru Yá”. La campaña denuncia que los sistemes de recomendación de les plataformes tán diseñaos pa maximizar el tiempu de permanencia y la interacción, priorizando’l beneficiu económicu percima del bienestar de los menores. Lara Contreras, direutora d’Influencia de UNICEF España, desplica que los algoritmos puen “amplificar conteníos que los enganchen, condicionar idees o exercer presión sobre la so imaxe física”. Por ello, la organización ta recoyendo firmes pa llevar una propuesta concreta al Mobile World Congress, esixendo que se limite l’adicción provocada pol scroll infinitu y el autoplay, y que se garanticen sistemes de verificación d’edá efectivos.
Propuestes pal futuru L’informe nun se queda namás nel diagnósticu, sinón que propón una serie d’aiciones pa protexer a la infancia nel mundu dixital. Ente elles, destaca la necesidá d’integrar la prevención dixital dende l’atención primaria, fomentar la educación afectivo-sexual pa compensar l’impautu de la pornografía y esixir rindir cuentes a les empreses teunolóxiques pol impautu de los sos productos nos derechos de los menores.
Dende UNICEF aclaren que nun busquen prohibir la teunoloxía, sinón facela más ética y segura. “La promoción d’un usu seguru y saludable de los dispositivos dixitales involúcranos a toos como sociedá”, conclúi’l documentu.
