Picos d’Europa llanza un pasaporte turísticu para fomentar la visita a les sos trés aguaes/vertientes.
Los visitantes van poder consiguir sellos, premios y la reconocencia de «Senderista Premium» al completar los percorríos propuestos. Sol nome de «Pasaporte de los Picos», el programa dio empiezu esti llunes 20 de xunetu. La Voz /
El Parque Nacional de Picos d’Europa punxo en marcha una nueva iniciativa turística que va dexar a los visitantes coleccionar sellos y llograr reconocencies a midida que percuerran dalgunos de los principales enclaves d’esti espaciu natural protexíu compartíu per Castiella y Llión, Asturies y Cantabria.
Sol nome de «Pasaporte de los Picos», el programa dio empiezu esti llunes 20 de xunetu con una fase piloto que se va desenvolver mientres 2026 y 2027 con posibilidá d’ampliación posterior, según informó’l Parque Nacional al traviés de les sos canales oficiales.
La iniciativa convida a los viaxeros a recoyer un cuadernín o pasaporte en cualesquier de los centros de visitantes del parque y acreditar por aciu sellos el so pasu per distintes rutes y puntos d’interés distribuyíos polos trés territorios qu’integren esti espaciu protexíu.
Na aguada lleonesa, el pasaporte va poder llograse nel Centru de Visitantes de Posada de Valdeón y na Casa del Parque d’Oseya de Sajambre, ente que n’Asturies va tar disponible nel Centru Pedro Pidal, al pie de los Llagos de Cuadonga, y en Cantabria nel Centru de Sotama.
L’oxetivu ye incentivar la conocencia del conxuntu del parque nacional, animar a los visitantes a percorrer enclaves menos frecuentaos y afayar la diversidá paisaxística, cultural y ambiental qu’alluga esti espaciu declaráu Parque Nacional en 1918, el primeru d’España.
Los participantes tendrán de visitar les rutes y llugares incluyíos nel programa para consiguir los sellos acreditativos. Conforme completen los distintos retos plantegaos pola organización, van poder aportar a distintos niveles de reconocencia y llograr obsequios rellacionaos cola iniciativa.
Amás, quien llogren completar la totalidá del percorríu previstu van recibir una acreditación especial como «Senderista Premium» y la reconocencia d’Embaxador acreditáu del Parque Nacional de los Picos d’Europa», acompañáu d’un diploma oficial.
Dende’l Parque Nacional precisaron que namá van ser válides para’l programa les visites y percorríos realizaos a partir del 20 de xunetu, fecha d’entamu de l’actividá, y que la participación tendrá d’afaese a les normes establecíes nel reglamentu disponible nos centros de visitantes, informa Efe.
