El campeón asturianu de Kung Fu que convirtió l’adversidá na so mayor fortaleza: «Lo que más me costó ye consiguir el respetu de todo». Cristian Bayón Augusto, campeón de Kung Fu. Instagram / La Voz /
El deportista l.lenizu, galardonáu nel ámbitu nacional del kung fu, reivindica’l deporte como una ferramienta de superación ya inclusión para les persones con discapacidá. Cristian Bayón Augusto, de 27 años, orixinariu de La Pola L.lena y residente en Xixón, atropa dellos premios de Kung Fu a nivel nacional, non yá representando a Asturies, sinón tamién siendo exemplu d’una hestoria de superación personal y de llucha contra los estereotipos escontra les persones con discapacidá que va más allá de les artes marciales.
Empezó practicando Kárate na infancia, nel cual yá destacaba poles sos habilidá. Sicasí, a la edá de 17 años tuvo que cesar la so actividá deportiva por cuenta d’una mancadura de llombu que-y obligó a pasar delles vegaes por quirófanu y parar mientres casi siete años. Daqué que supunxo una dómina difícil tantu para él como para la so familia. Nun foi hasta 2021 que retomó les artes marciales, esta vegada col Kung fu, una disciplina distinta pero onde pudo tresferir les sos habilidaes y avanzar rápido, llogrando algamar una importante reconocencia a nivel local y nacional.
Tantu ye asina que en 2022 foi campeón d’Asturies, mesmu añu nel que participó n’otru campeonatu en Algemesí onde se llevó una medaya de plata. Al añu siguiente, en 2023, llevóse’l puestu de campeón d’España en modalidá Parakungfu y una medaya d’oru. Nos años siguientes foi atropando más reconocencies, llegando a les cuatro medayes d’oru y dos de plata y tamién el Premiu a la Superación na Gala del deporte asturiano.
La so reconocencia más recién foi esti mes pasáu nel III Campeonatu Gallego de Kung Fu Interautonómico, onde se llevó otres dos medayes d’oru. Para Cristian, esti ésitu supon non yá una gran fonte de felicidá, sinón tamién la oportunidá de dar representación a otres persones con discapacidá y sirvir d’inspiración.
«Siéntome bien afortunáu. Con esto doi visibilidá a otres persones con discapacidá por que vean qu’ellos tamién lo pueden faer», esplica. Amás d’estes victories, Cristian aprecia tamién otros beneficios qu’el Kung Fu apúrre-y en el so vida diaria, como son «l’axilidá, l’equilibriu y los reflexos», según comenta.
Sicasí, tamién destaca cómo-y costó abrir pasu nuna redolada onde de primeres nun atopaba’l so sitiu dáu a los prexuicios de munchos y a la contrariedá d’abrir los deportes a redolaes más inclusives. «Costóme consiguir el respetu de toos y que confíen en mi», recuerda
Anguaño, ta bien centráu en siguir ameyorando les sos mañes, entrenando dellos díes a la selmana na Escuela Nei d’artes marciales de Xixón, onde se prepara para nueves competiciones no que queda d’añu para siguir representando a Asturies, tantu dientro d’España, como posiblemente nel estranxeru. «Gustaríame representar España y Asturies», almite. Amás, tamién-y gustaría dedicar se a la enseñanza nun futuru, pudiendo tresmitir les sos conocencies sobro defensa personal a otros mozos por que ellos tamién puedan atopar el so propiu camín dientro d’esti ámbitu.
Toles hestories de superación lleven una enseñanza final, y nel casu de Cristian, siempres-y gusta compartir lo que vivió col fin d’inspirar a quien pasaren por situaciones similares. Pa él, el so lema personal ye nunca rindise frente a l’adversidá y siguir escorriendo los suaños. «Nun Rindáis. Hai que lluchar siempres y hai que vivir la vida», diz tayante.
Más allá de los títulos y les medayes, la trayectoria de Cristian Bayón demuestra que’l deporte tamién puede convertise nuna ferramienta pa baltar prexuicios y abrir camín a una sociedá más inclusiva. Con vistir puesta en nuevos retos y el deséu de siguir representando a Asturies, la so hestoria ye’l reflexu de que la constancia y l’esfotu pueden imponese inclusive a les torgues más difíciles.
Un exemplu de superación que tesciende l’ámbitu deportivu y que busca animar a otres persones a nun arrenunciar nunca a los sos oxetivos. Amás, comparte’l so día ente día, los sos entrenamientos y los sos llogros deportivos al traviés del so perfil de Instagram, cristianbayonaugusto.
