Caltener la navegación, contactar con Salvamentu Marítimu y nun fadiar a los animales son les principales pautes.
Tres embarcaciones sufrieron daños causaos por orques nes últimes hores nel Cantábricu, nes costes d’Asturies y Galicia. Dende’l Cepesma y organismos oficiales como’l Miteco ellaboraron una serie d’encamientos en casu d’atopanos con estos animales.
De primeres, caltener la tranquilidá, nun glayar y evitar faer ruíu. Tamién se debe llamar a Salvamentu Marítimu. Si ye posible, nun parar la embarcación y navegar hacia la costa.
Hai que tener en cuenta que les orques son animales xabaces y protexíos. Nunca tienen d’usase midíes o elementos que puean estropiales o fadiales.
A lo último, recuérdennos qu’estes interacciones son de gran interés científicu. Si fuera seguro pa la tripulación faer semeyes o vídeos, sedría deseable mandalos al corréu electrónicu orcassasemar.es pa documentar l’alcuentru.
Les interacciones ente orques y veleros, un fenómenu cada vez más frecuente
Nun ye raro atopase con orques nes nueses costes, especialmente a finales de branu. Sicasí, hai un nuevu comportamientu qu’empezó a dase estos últimos años. Trátase de les interacciones con embarcaciones.
La mayoría d’estes interacciones fueron con veleros. Los espertos creen que la parte trasera d’estes embarcaciones, onde ta’l timón llámen-yos especialmente l’atención, anque se desconoz el por qué.
Anque ye importante saber cómo actuar nestes situaciones, tamién nos recuerden qu’hai que respetar a esta especie catalogada como vulnerable por Miteco.
