Dos embarcaciones franceses fueron atacaes nes últimes hores por delles orques a unes 20 milles de la costa asturiana. Los daños sufríos obligáronlos a ser remolcaes a puertu, amás de que los sos tripulantes sufrieron un bon sustu.
L’ataque a unu de los dos veleros franceses foi grabáu dende un pesqueru a unes 20 milles de la costa del occidente asturianu. Dambos fueron remolcaos al cai de Ribadeo por una embarcación de Salvamentu Marítimu tres sufrir serios daños nel timón, quedando al debalu.
Los daños fueron visibles esta mañana al ser alzada la embarcación pola grúa. La pala del timón desapaeció, anque podría ser peor si causara una vía d’agua. A bordu d’esta embarcación viaxaben dos xubilaos franceses, de la Bretaña. Taben percorriendo la costa asturiana en dirección al golfu de Vizcaya cuando sufrieron el socesu.
Nun ye’l primer ataque d’estes característiques na costa cantábrica a veleros. Medraron nos últimos años, provocando’l mieu ente los aficionaos a deportes náuticos, qu’en munches ocasiones deciden nun facer estos viaxes por medrana.
Piden soluciones p’amenorgar el númberu d’ataques, planes pa facer fuxir a unes especies que nel añu cambien los sos trayectos, principalmente siguiendo a los bonitos.
Agora va haber que reparar los daños nes embarcaciones. Atopar a profesionales que puean faer frente a unos trabayos que nin son cenciellos nin rápidos.
