💙💛💙💛El presidente anunció nel VIII Alcuentru Hispanu-Americanu de Colombres que va viaxar a Arxentina n’ochobre, con motivu del V Congresu Mundial de Asturianía. 🗣️ Adrián Barbón tamién encamentó nel actu a convertir los llazos afeutivos cola emigración en nueves aliances culturales, sociales y económiques para construyir “la meyor Asturies” ℹ️ Actualidá 👇
El Gobiernu d’Asturies clausuró esta tarde’l tercer y últimu cursu de la séptima promoción de la Escuela d’Asturianía con un actu presidíu pola vicepresidenta, Gimena Llamedo, nel que s’apurrieron los diplomes a los 24 estudiantes participantes. Con esta formación, el Principáu refuerza’l relevu xeneracional de los centros asturianos y contribúi a caltener vives la cultura y les tradiciones asturianes.
Mientres dos selmanes, l’alumnáu, procedente d’Uruguai, Chile, Arxentina, Venezuela y distintes comunidaes españoles, recibió formación en llingua asturiana, gaita, baille, tambor, cantar y cultura tradicional para treslladar darréu eses conocencies a los sos respectivos centros.
Mientres la clausura, Llamedo estimó’l compromisu del alumnáu y destacó que la escuela “caltien güei el mesmu sentíu col que nació: guarnir el venceyu ente Asturies y quien, entá viviendo llueñe, nunca dexaron de sentila como’l so llar”.
La vicepresidenta tamién sorrayó que’l verdaderu oxetivu del programa empieza agora: “La escuela nun termina güei. Empieza güei. Cuando tornéis a los vuesos centros vais ser quien enseñéis a la mocedá, quien tresmitáis un cantar, un baille, una palabra n’asturianu o una tradición que forma parte de la nuesa identidá colectiva. Vais actuar como tresmisores y tresmisores d’asturianía”.
Coles mesmes, señaló que l’ésitu d’esta iniciativa mora na so capacidá pa fortalecer el llabor de los centros asturianos y asegurar la continuidá de la cultura tradicional xeneración tres xeneración. “Cada actividá qu’entaméis, cada clase qu’impartáis y cada iniciativa que pongáis en marcha van contribuyir a qu’Asturies siga tando presente a miles de kilómetros d’equí”, indicó.
Llamedo reafitó’l compromisu del Gobiernu del Principáu cola ciudadanía residente nel esterior, por aciu el sofitu a los centros asturianos, les polítiques de torna y programes como la Escuela d’Asturianía. Nesti sentíu, recordó que’l próximu mes d’ochobre Bonos Aires va acoyer el V Congresu Mundial d’Asturianía, que se va celebrar per primer vegada fora d’Asturies y va sirvir pa reforzar los venceyos ente la comunidá y les coleutividaes asturianes partíes pel mundu.
