Toma nota d’esti plan. Nel Pabellón del Principáu d’Asturies en FIDMA (Xixón) puedes percorrer con realidá virtual los espacios culturales más emblemáticos de la rexón, afayar l’Asturies más innovadora y aprender a echar sidra como un auténticu asturianu.
Del 1 al 16 d’agosto | 
Recinto Ferial Luis Adaro. #FIDMA2026 #Asturias #ParaísoNatural
Cuarenta y cinco años merécense una celebración. Por eso, el Pabellón del Gobiernu del Principáu na 69 Feria Internacional d’Amueses d’Asturies (FIDMA) engalánase anguaño para celebrar l’aniversariu de l’aprobación del Estatutu d’Autonomía d’Asturies, na que va ser la primer parada d’un programa d’actividaes que se va desenvolver mientres los próximos meses por tola Comunidá Autónoma.
Sol lema Asturies yes tú, les persones que nos visiten van afayar nel estand institucional munches de les coses que más importen, como la sanidá, la educación, los cuidos, la igualdá, la movilidá o’l mediu ambiente; y que tienen la so base nel Estatutu. Van poder remembrar munchos de les meyores que se producieron en pueblos y ciudaes, nes infraestructures, en centros educativos, en centros de salú y n’hospitales, na atención a los mayores, nel ámbitu tecnolóxicu o nel caltenimientu y protección del nuesu paraísu natural”. Cambeos que dexaron ameyorar la calidá de vida y reforzar la cohesión nel territoriu, garantizando más servicios, más oportunidaes y más bienestar.
Estos primeres 45 años d’Estatutu d’Autonomía son una hestoria d’ésitu colectivu al que muncha xente trabayó y apurrió pa construyir Asturies, día ente día. Por eso, como en toa celebración que s’aprecie, el Principáu da la bienvenida a los visitantes cola recreación d’una romería, tradicional espaciu d’alcuentru, convivencia y tradición.
Nel interior del pabellón, munches esperiencies en primer persona espérente. ¿Quies esperimentar cómo opera un robot DaVinci nos hospitales asturianos? ¿Probar les novedaes na aplicación de la IA nel Principáu? ¿Conocer al primera humanoide desenvueltu n’Asturies? ¿Prúyete un paséu pola hestoria de La Llaboral? ¿O usar unes gafes de realidá aumentada pa percorrer dalgunos de los museos d’Asturies?
