XXIX FID’O: (web) Tapia conviértese un añu más en capital de la música celta. Revista FUSIÓN
Emoción, entretenimientu y bona música acompañen a la celebración del FID’O, el Festival Intercélticu del Occidente, una Fiesta d’Interés Turísticu Rexonal consolidada qu’asitia a Tapia de Casariego como epicentru del soníu y la cultura celta. Programa completu.
La edición anterior concentró l’actividá del Festival nel centru de la villa convirtiendo a la localidá nun curiosu escenariu musical. La vigesimonovena llega para siguir alimentando la buelga d’esti eventu que se desenvuelve del 6 al 10 d’agostu y visibiliza los llazos culturales de la franxa atlántica so una confluencia d’artistes, agrupaciones folclóriques y bandes de gaites procedentes d’Asturies, Galicia, Escocia, Bretaña ya Irlanda.
La inauguración oficial del festival va tener llugar el xueves 6 d’agostu col izado de la bandera celta y la posterior apertura del mercáu medieval qu’ocupa les cais de la capital tapiega nestos díes. Equí ye posible mercar tou tipu de productos artesanales y agroalimentarios, dende miel de la zona, embutíos, repostería y quesos emblemáticos de la rexón hasta bixutería y creaciones d’artesanos de la cerámica y el cueru, ente munchos otros.
Nun falten tampoco una pulpeira na que tomar el pulpu “a la gallega” nin el stand onde esfrutar d’un culín de sidra, tollo amenizado por bailles folclóricos y el soníu de les distintes bandes de gaites que participen nel FID’O.
Na xornada del xueves tamién va ser posible esfrutar d’una nueche de pandereta col grupu asturianu Fitireteres y el gallegu Serendén nel Auditoriu de Tapia de Casariego, ente que’l Puertu de Tapia acueye una verbena tradicional colos grupos Bandina Los Collaínos, Bandina Rióles-yos y el Grupu de Baille Tradicional Ramón de Campoamor.
Ente los momentos entrañables d’esti eventu atopa’l tradicional homenaxe a los marineros nel mirador de Los Cañóis que tien llugar na mañana del sábadu, una cita emotiva na que se recuerden a toos aquellos marineros que perdieron la so vida nel mar y tamién a los qu’acaldía siguen afaenando nel Cantábricu.
