🎨 La novena edición del festival de muralismo contextual va celebrase del 31 d’agostu al 6 de setiembre con intervenciones artístiques, talleres y actividaes participatives que busquen “habitar” los espacios antes de pintalos. Mi Oviedo
El festival caltien la filosofía cola que nació: alloñase d’un muralismo entendíu como una intervención puntual o decorativa para apostar por obres venceyaes al territoriu. “Antes de pintar, habitamos el llugar”, defende la organización, que plantega cada mural como un procesu d’escucha de la memoria oral, la identidá y les hestories cotidianes de los barrios.
Nesta edición van participar trés artistes que van desenvolver los sos trabayos en distintos puntos d’Uviéu. Maite Rosende va ser la encargada de reinterpretar el mural históricu La Cometa, allugáu na cai Huertas, ente que Greta von Richthofen va trabayar alredor del Dragón urbanu: la Sacavera d’Uviéu, na cai Vázquez de Mella. Pela so parte, Mar Herrera va centrar la so intervención na memoria industrial y popular del barriu de Teatinos, na cai Rosa María Menéndez López.
El programa va completase con un mural participativu nel túnel de Nicolás Soria, desenvueltu al pie de l’Asociación Activa Ciudá Naranco, según con talleres de serigrafía y construcción de cometes, actividaes familiares y los paseos empuestos “Más allá del mural”, una propuesta que busca averar a vecinos y visitantes el contestu de les obres realizaes mientres el festival.
Dende Parees Fest defenden qu’el muralismo puede convertise n’una ferramienta para reforzar el venceyu ente la ciudadanía y l’espaciu urbanu. El festival apuesta por un modelu nel que les intervenciones non solo tresformen visualmente una paré, sinón que recueyan relatos y elementos propios de los llugares onde s’alluguen.
