La Cofradía de Pescadores Santana de Llanes, Premiu al Pueblu Exemplar d’Asturies 2026.
El xuráu destaca la sostenibilidá, l’estudiu y espardimientu de la cultura pesquera. De la tradición pesquera del sieglu XIV a la defensa de la pesca sostenible en plenu sieglu XXI. Conoz más sobro la Confrería de Pescadores Santa Ana (Llanes).
El xuráu del Pueblu Exemplar valora’l so trabayu pola sostenibilidá, la innovación, la solidaridá, l’estudiu y l’espardimientu de la cultura pesquera, y la eficiencia nel so modelu de xestión. Amás, reconoz con esti premiu a toles cofradíes de pescadores y a la so xente.
La puya diaria de captures, destacada pol so compromisu cola pesca sostenible por National Geographic, les fiestes de Santana o les distintes xornaes gastronómiques, son dalgunes de les munches actividaes de promoción que fai la cofradía de pescadores de Santana.
Llanes, Pueblu Exemplar d’Asturies pola so tradición marinera
Llanes ye dende güei un pueblu de pescadores exemplares. La reconocencia garrólos faenando na mar y ficiéronla estensiva a tol sector pesqueru asturianu. Ocho sieglos de tradición marinera, la defensa de la pesca artesanal y el caltenimientu del medio marín avalaron la so candidatura.
La Cofradía ye tamién un exemplu d’actividá social y cultural. Ente los sos proyectos ta la ruta del Paséu de la princesa Leonor, un percorríu pel qu’esperen que pasen los reis d’España y la princesa d’Asturies na so visita a Llanes.
Un premiu que los llaniscos sienten tamién como propiu. L’alcalde Enrique Riestra espera que la visita de la familia real sirva pa que Felipe VI, Letizia y la princesa Leonor lleven una bona imaxe de Llanes y de la so xente.
La cofradía llanisca ye yá Pueblu Exemplar, y los sos pescadores quieren compartir la reconocencia con tolos que caltienen viva la tradición marinera asturiana. Tamién con quien yá nun tán, como Lolo, el ‘Reviru’, muertu esta primavera y siempres bien presente na alcordanza de los sos compañeros.
