El Principáu va ufiertar esti cursu 92 funciones gratuites pa escolares de 36 conceyos nel marcu de la ‘Xira Didáctica’ Reserves pa los centros educativos: del 17 al 30 de setiembre Toles actividaes son gratuites actualidad.asturias.es/-/xira0911
El Gobiernu d’Asturies va ufiertar esti cursu 92 funciones gratuites para escolares de 36 conceyos nel marcu de la ‘Xira Didáctica’. Los centros educativos van poder formalizar les sos reserves del 17 al 30 de setiembre para esta iniciativa, qu’avera al alumnáu les llingües propies d’Asturies. Programa Xira Didáctica 2026-2027
La programación, que va empezar el 19 d’ochobre en Quirós, inclúi propuestes d’artes escéniques, musicales, lliteratura, cultura tradicional, cine y ciencia dende Infantil hasta Bachilleratu.
El director xeneral d’Acción Cultural y Normalización Llingüística, Antón García, y la directora xeneral d’Inclusión Educativa y Ordenación, María Dolores Bonu, presentaron esta mañana en La Llaboral la nueva edición de la Xira Didáctica, una iniciativa que xune educación y cultura y avera al alumnáu les llingües propies del Principáu, l’asturianu y al eonaviego, al traviés de propuestes diseñaes específicamente para les distintes etapes educatives.
La edición d’esti cursu, que cunta tamién con financiamientu del Ministeriu de Cultura, inclúi 92 funciones y actividaes gratuites en 36 conceyos y amplía el so algame respecto al cursu anterior, tantu pola variedá de la programación como pola so estensión nel territoriu: la Xira pasa de 30 a 46 proyectos, de 26 a 37 compañíes, profesionales y entidaes y de 30 a 36 conceyos.
Artes escéniques, música, lliteratura, cultura tradicional, cine y ciencia formen parte d’un catálogu empobináu a escolares dende Infantil hasta Bachilleratu. L’alumnáu va poder esfrutar de propuestes creaes pola industria cultural asturiana y diseñaes por que el aprendizaxe de les llingües propies rellaciónese tamién cola esperiencia cultural, combinando conteníos afechos a cada edá cola calidá artística de los espectáculos y actividaes.
La Xira Didáctica va empezar el 19 d’ochobre en Quirós con El trasgu y el molineru, de La Compañía del Alba, y va rematar el 18 de xunu con dos propuestes: Al rodiu l’horru, de É Vero Teatru, en Cabranes, y Verdína. El día qu’una faba cósmica aterrizó n’Asturies, de L’Arca de Mozart, en Les Regueres.
La participación en toles actividaes ye gratuita, lo que dexa averar una programación cultural estable n’asturianu y eonaviego a escolares y convertir teatros, cases de cultura y otros espacios en llugares d’alcuentru ente la llingua, la creación y l’aprendizaxe.
Reserves y balance del últimu cursu
Los centros educativos van poder formalizar les sos reserves ente les 9:00 hores del 17 de setiembre y les 23:59 hores del día 30, al traviés de la plataforma de la Xira Didáctica. Les places son llindaes y va tener prioridá l’alumnáu matriculáu en llingua asturiana o eonaviego, anque si queda disponibilidad van poder participar tamién otros estudiantes comenenciudos.
La nueva edición parte, amás, de la bona respuesta llograda mientres el cursu 2025/2026, cuando más de 9.000 estudiantes de 145 centros educativos participaron en 90 funciones celebraes en 30 conceyos. Esti cursu, la Xira amplía’l númberu de propuestes, suma nueves compañíes y estiende la so presencia a seis conceyos más, consolidando xuna programación que lleva l’asturianu y el eonaviego más allá de l’aula y venceyar col teatru, la música, la lliteratura, la ciencia, el cine y la cultura tradicional.
